മുട്ടിൽ മരംമുറി കേസ്: അഗസ്റ്റിൻ സഹോദരങ്ങൾക്ക് കനത്ത തിരിച്ചടി; അമ്പലമേട് പൊലീസ് രജിസ്റ്റർ ചെയ്ത കേസ് റദ്ദാക്കണമെന്ന ഹർജി തള്ളി ഹൈക്കോടതി

കൊച്ചി: വിവാദമായ മുട്ടിൽ മരംമുറിയുമായി ബന്ധപ്പെട്ട് എറണാകുളം അമ്പലമേട് പൊലീസ് രജിസ്റ്റർ ചെയ്ത കേസ് റദ്ദാക്കണമെന്ന് ആവശ്യപ്പെട്ട് പ്രതികളായ അഗസ്റ്റിൻ സഹോദരങ്ങൾ സമർപ്പിച്ച ഹർജി ഹൈക്കോടതി തള്ളി. കേസിൽ വിചാരണ നേരിടാൻ തക്കവിധമുള്ള മതിയായ കുറ്റങ്ങളും തെളിവുകളുമുണ്ടെന്ന് വ്യക്തമാക്കിക്കൊണ്ടാണ് ഹൈക്കോടതി ഉത്തരവ്.

കേസ് റദ്ദാക്കണമെന്ന അഗസ്റ്റിൻ സഹോദരങ്ങളുടെ ആവശ്യം നേരത്തെ ചോറ്റാനിക്കര മജിസ്ട്രേറ്റ് കോടതിയും തള്ളിയിരുന്നു.
വനംവകുപ്പിന്റെ സാധുവായ പാസുണ്ടെന്ന് തെറ്റിദ്ധരിപ്പിച്ച്, വയനാട്ടിൽ നിന്ന് മുറിച്ചുകടത്തിയ ഈട്ടിമരങ്ങൾ അമ്പലമേട് സ്റ്റേഷൻ അതിർത്തിയിലുള്ള ഒരു സ്വകാര്യ മരക്കമ്പനിക്ക് വിൽപ്പന നടത്താൻ ശ്രമിച്ചതിനാണ് പൊലീസ് കേസെടുത്തത്. എന്നാൽ ഈ മരങ്ങൾ കടത്തിക്കൊണ്ടുപോകാൻ ‘ഫോം 3’ പാസിന്റെ ആവശ്യമില്ലെന്നായിരുന്നു പ്രതിഭാഗം കോടതിയിൽ ഉന്നയിച്ച പ്രധാന വാദം. എന്നാൽ ഈ വാദം തള്ളിയ കോടതി, കേസിൽ വിചാരണ നടപടികളുമായി മുന്നോട്ടുപോകാൻ ആവശ്യമായ തെളിവുകളുണ്ടെന്ന് നിരീക്ഷിക്കുകയായിരുന്നു. വിൽപ്പന നടത്താൻ ശ്രമിച്ച മരങ്ങൾ പിന്നീട് വനംവകുപ്പ് കസ്റ്റഡിയിലെടുത്തിരുന്നു.