ക്ഷേത്ര ഉത്സവത്തിന് രാഹുൽ ഗാന്ധിയുടെ പ്രസംഗവും പോട്ട ക്രൈസ്തവ ധ്യാനകേന്ദ്രത്തിന്റെ പരസ്യവും പ്രദർശിപ്പിച്ച് ദേവസ്വം ബോർഡ്; പണത്തിനു വേണ്ടി ക്ഷേത്രാചാരങ്ങളെ അപമാനിക്കുന്നതായി പരാതി; ശക്തമായി അപലപിച്ച് ഭക്തർ

എറണാകുളം: ക്ഷേത്ര ഉത്സവത്തിനിടെ രാഹുൽ ഗാന്ധിയുടെ പ്രസംഗവും പോട്ട ധ്യാനകേന്ദ്രത്തിന്റെ പരസ്യവും പ്രദർശിപ്പിച്ച് ദേവസ്വം ബോർഡ്. എറണാകുളം ശിവക്ഷേത്രത്തിലെ വാർഷികോത്സവത്തോട് അനുബന്ധിച്ച് കിഴക്കേ ഗോപുരത്തിൽ ദേവസ്വം ബോർഡ് സ്ഥാപിച്ച ഡിജിറ്റൽ ഡിസ്പ്ലേ ബോർഡിലാണ് രാഹുലിന്റെ പ്രസംഗവും മത പരിവർത്തനത്തെ പ്രോത്സാഹിപ്പിക്കുന്ന ധ്യാനകേന്ദ്രത്തിന്റെ പരസ്യവും പ്രത്യക്ഷപ്പെട്ടത്. പകൽപ്പൂരത്തിനായി എറണാകുളത്തപ്പൻ എഴുന്നള്ളി നിൽക്കുമ്പോഴാണ് ഈ പ്രദർശനമുണ്ടായത്. ഭാരത് ജോഡോ യാത്രയോടനുബന്ധിച്ച് രാഹുൽ ഗാന്ധി കശ്‌മീരിൽ നടത്തിയ പ്രസംഗമാണ് ‘രാഹുൽ ഗാന്ധിയുടെ വികാരനിർഭരമായ പ്രസംഗം’ എന്ന പേരിൽ പരസ്യ ബോർഡിൽ പ്രദർശിപ്പിച്ചത്.

ജനുവരി 23 മുതൽ ഫെബ്രുവരി 02 വരെയാണ് എറണാകുളം ശിവക്ഷേത്രത്തിലെ ഇത്തവണത്തെ വാർഷികോത്സവം. പ്രശസ്തമായ ക്ഷേത്രോത്സവത്തിനിടെ ഉണ്ടായ വീഴ്ച ക്ഷേത്രാചാരണങ്ങളെ അപമാനിക്കുന്നതാണെന്ന് ഭക്തർ പരാതിപ്പെടുന്നുണ്ട്. പണത്തിനു വേണ്ടി എന്തും ചെയ്യാൻ ദേവസ്വം ബോർഡ് തയ്യാറാണെന്നും ഈ നയത്തിൽ ശക്തമായി പ്രതിഷേധിക്കുന്നതായും ഭക്തർ അറിയിച്ചു.