ശ്രീകാര്യം: ശ്രീകാര്യം സാദ് അൽ ഫാറൂഖ് ഹോട്ടലിൽ നിന്നും ഭക്ഷണം കഴിച്ചവർക്ക് ഭക്ഷ്യ വിഷബാധ. ഹോട്ടലിൽ നിന്ന് ഭക്ഷണം വാങ്ങി കഴിച്ച 8 പേർക്കാണ് ഭക്ഷ്യ വിഷബാധയുണ്ടായത്. ഇവരെ പാങ്ങപ്പാറ സാമൂഹിക ആരോഗ്യ കേന്ദ്രത്തിലേക്ക് മാറ്റി. ആരുടെയും നില ഗുരുതരമല്ല.
സംഭവത്തെ തുടർന്ന് നഗരസഭയിലെയും പാങ്ങപ്പാറ സാമൂഹിക ആരോഗ്യ കേന്ദ്രത്തിലെയും ഹെൽത്ത് സ്ക്വാഡും ആരോഗ്യ പ്രവർത്തകരും ഹോട്ടലിലെത്തി പരിശോധന നടത്തി. പരിശോധനക്ക് ശേഷം ഇവിടെ നിന്നും പഴകിയ ഭക്ഷണങ്ങൾ പിടിച്ചെടുത്തതായി ആരോഗ്യ പ്രവർത്തകർ അറിയിച്ചു. പിന്നാലെ അധികൃതർ ശ്രീകാര്യത്ത് പ്രവർത്തിക്കുന്ന സാദ് അൽ ഫാറൂഖ് എന്ന ഹോട്ടൽ അടച്ചു പൂട്ടി.
മുമ്പും ഇത്തരത്തിലുള്ള സംഭവങ്ങൾ ഈ ഹോട്ടലിൽ നിന്നുണ്ടായതായി റിപ്പോർട്ട് ചെയ്യുന്നുണ്ട്. 18 ന് ഈ ഹോട്ടലിൽ നിന്നും ഷവർമയും മറ്റും പാഴ്സലായി വാങ്ങി കൊണ്ടുപോയി വീട്ടിൽ വച്ചു കഴിച്ച ശ്രീകാര്യം ചേന്തിയിലെ ഒരു ഒരു കുടുംബത്തിലെ ആറു പേർക്കും കൂടാതെ ഇതേ ദിവസം ഇവിടെ നിന്നും ഷവർമ വാങ്ങി കഴിച്ച കാര്യവട്ടം, കഴക്കൂട്ടം സ്വദേശിയകളായ രണ്ടു പേർക്കുമാണ് വയറു വേദനയും ഛർദിയും മറ്റ് അസ്വസ്ഥതകളും ഉണ്ടായത്. അവർ രണ്ടു ദിവസമായി പാങ്ങപ്പാറ സാമൂഹിക ആരോഗ്യ കേന്ദ്രത്തിൽ ചികിത്സയിലാണ്. ആരുടെയും നില ഗുരുതരമല്ലെന്ന് ആരോഗ്യ പ്രവർത്തകർ അറിയിച്ചു.