ശ്രീലങ്കയിലെ രാഷ്‌ട്രീയ പ്രതിസന്ധി; ധനമന്ത്രി നിർമ്മലാ സീതാരാമൻ വിദേശകാര്യ മന്ത്രി എസ് ജയശങ്കർ എന്നിവരുടെ നേതൃത്വത്തിൽ വിളിച്ച സർവ്വകക്ഷിയോഗം ഇന്ന് ചേരും

കൊളംബോ: ശ്രീലങ്കയിൽ നേരിടുന്ന രാഷ്‌ട്രീയ പ്രതിസന്ധി ചർച്ച ചെയ്യാൻ കേന്ദ്ര സർക്കാർ വിളിച്ച സർവ്വകക്ഷി യോഗം ഇന്ന് ചേരും. കേന്ദ്ര ധനമന്ത്രി നിർമ്മലാ സീതാരാമൻ വിദേശകാര്യ മന്ത്രി എസ് ജയശങ്കർ എന്നിവരുടെ നേതൃത്വത്തിലാകും യോഗം നടക്കുക. എഐഎഡിഎംകെ,ഡിഎംകെ ഉൾപ്പെടെയുള്ള പാർട്ടികൾ ഇന്ത്യ വിഷയത്തിൽ ഇടപെടണമെന്ന് ആവശ്യപ്പെട്ടിരുന്നു.

ശ്രീലങ്കയിൽ നിന്നും അഭയാർത്ഥികളെത്തുന്നതടക്കമുള്ള വിഷയങ്ങളിൽ സ്വീകരിക്കേണ്ട നിലപാടുകളിൽ കേന്ദ്രസർക്കാർ യോഗത്തിൽ അഭിപ്രായം തേടിയേക്കുമെന്നാണ് വിവരം. കൂടാതെ നിലവിലെ സാഹചര്യത്തെക്കുറിച്ച് യോഗം ചർച്ച ചെയ്യും.

100 ദിവസങ്ങൾ പിന്നിട്ടിട്ടും ശ്രീലങ്കയിൽ പ്രതിഷേധങ്ങൾ തുടരുകയാണ്. ജനകീയ സർക്കാർ രൂപീകരണ ആവശ്യമുന്നയിച്ചാണ് പ്രക്ഷോഭം തുടരുന്നത്. ശ്രീലങ്കയിൽ ഭക്ഷ്യ- ഇന്ധന ക്ഷാമം തുടരുന്ന സാഹചര്യത്തിൽ അതിനൊരു അടിയന്തര പരിഹാരമാണ് ജനങ്ങൾ ആവശ്യപ്പെടുന്നത്.