48 മണിക്കൂര്‍ പൊതുപണിമുടക്ക് ആരംഭിച്ചു; പണിമുടക്കുമായി സഹകരിക്കില്ലെന്ന് വ്യാപാരി വ്യവസായി ഏകോപന സമിതി അറിയിച്ചു

തിരുവനന്തപുരം: സംയുക്ത ട്രേഡ് യൂണിയനുകൾ ആഹ്വാനം ചെയ്ത 48 മണിക്കൂര്‍ ദേശീയ പണിമുടക്ക് ആരംഭിച്ചു. ചൊവ്വാഴ്‍യ്ച രാത്രി 12 മണി വരെയാണ് പണിമുടക്ക് നീളുക. ബിഎംഎസ് ഒഴികെ ഇരുപതോളം സംഘടനകള്‍ സംയുക്‌തമായി പണിമുടക്കിൽ പങ്കെടുക്കുന്നുണ്ട്.

അതേസമയം, കടകൾ അടച്ചിടണമെന്ന് ട്രേഡ് യൂണിയനുകൾ ആഹ്വാനം ചെയ്‌തെങ്കിലും, പണിമുടക്കിനോട് സഹകരിക്കില്ലെന്ന് വ്യാപാരി വ്യവസായ ഏകോപന സമിതി അറിയിച്ചിട്ടുണ്ട്. കട തുറന്ന് പ്രവർത്തിക്കാൻ തയ്യാറാകുന്നവർക്ക് സംരക്ഷണം നൽകണമെന്ന് ആവശ്യപ്പെട്ട് മുഖ്യമന്ത്രിയ്ക്ക് കത്ത് കൈമാറുകയും ചെയ്തിരുന്നു.

പണിമുടക്കിന്റെ ആദ്യ മണിയ്ക്കൂറുകൾ കഴിയുമ്പോൾ കേരളത്തിൽ ജനം വലയുന്ന അവസ്ഥയാണ് ഉള്ളത്. പോലീസ് സംരക്ഷണത്തിൽ റെയിൽവേ, എയർപോർട്ട് അത്യാവശ്യ സർവീസുകൾ മാത്രമാണ് നടത്തുന്നത്. എന്നാൽ, മുംബൈ, ദില്ലി പോലുള്ള മഹാനഗരങ്ങളെ പണിമുടക്ക് തെല്ലും ബാധിച്ചിട്ടില്ല.