വ്യാജ കൊറോണ മരണ സർട്ടിഫിക്കറ്റ് ഉപയോഗിച്ചവർക്ക് പണി വരുന്നു; തട്ടിപ്പിലൂടെ അർഹതയില്ലാത്തവർ ധനസഹായം കൈപ്പറ്റിയത് അന്വേഷിക്കണമെന്ന് സുപ്രീം കോടതി

കൊറോണ ബാധിച്ച് മരണപെട്ടവർക്കുള്ള ധനസഹായം വ്യാജ രേഖകൾ ഉപയോഗിച്ച് അർഹതയില്ലാത്തവർ കൈപ്പറ്റിയിട്ടുണ്ടോ എന്ന വിവരം അന്വേഷിക്കാൻ കേന്ദ്രസർക്കാരിന് സുപ്രീം കോടതിയുടെ നിർദ്ദേശം(Supreame court order). കേരളം ഉൾപ്പെടെ നാല് സംസ്ഥാനങ്ങളിൽ വ്യാജരേഖകൾ ഉപയോഗിച്ചുള്ള തട്ടിപ്പ് നടന്നിട്ടുണ്ടെന്ന് കേന്ദ്രം സംശയം പ്രകടിപ്പിച്ച പശ്ചാത്തലത്തിലാണ് കോടതിയുടെ ഇത്തരത്തിലെ നിർദ്ദേശം.

കൊറോണ മൂലം മരണപ്പെട്ടവരുടെ കുടുംബങ്ങൾക്ക് ധനസഹായം നൽകാനുളള സുപ്രീം കോടതി ഉത്തരവ് ദുരുപയോഗം ചെയ്യുന്നതിൽ നേരത്തെ കോടതി തന്നെ ആശങ്ക അറിയിച്ചിരുന്നു. വ്യാജ മെഡിക്കൽ സർട്ടിഫിക്കറ്റ് ഉണ്ടാക്കി അപേക്ഷ സമർപ്പിക്കുന്നതിലാണ് കോടതി ആശങ്ക പ്രകടിപ്പിച്ചത്. വിഷയത്തിൽ സിഎജി അന്വേഷണത്തിന് ഉത്തരവിടുമെന്നും കോടതി വ്യക്തമാക്കുകയും ചെയ്തിരുന്നു.

തുടർന്ന് പല സംസ്ഥാനങ്ങളിലും വ്യാജ അപേക്ഷകളുണ്ടെന്ന് കേന്ദ്രസർക്കാർ കോടതിയിൽ വ്യക്തമാക്കിയിരുന്നു. ഇത്തരത്തിൽ വ്യാജ സർട്ടിഫിക്കറ്റുകൾ ഉണ്ടാകുമെന്ന് പ്രതീക്ഷിച്ചില്ലെന്നായിരുന്നു കോടതി നൽകിയ പ്രതികരണം. ഇതിന് പിന്നാലെയാണ് അന്വേഷണം ആവശ്യപ്പെട്ട് കേന്ദ്രസർക്കാർ സമീപിച്ചത്. ഇതോടെ ആയിരുന്നു സുപ്രീം കോടതി അന്വേഷണത്തിന് ഉത്തരവിട്ടത്.