മുപ്പതിനായിരം പേർക്ക് വിഷു കൈനീട്ടവുമായി സുരേഷ് ഗോപി: ജനങ്ങൾക്ക് ആശംസകൾ നേർന്ന് താരം

തൃശൂർ: ഐശ്വര്യവും, സമ്പൽ സമൃദ്ധിയും പൂത്തുലയുന്ന വിഷുവിന് മുന്നോടിയായി ജനങ്ങൾക്ക് വിഷുകൈനീട്ടം നൽകി സുരേഷ് ഗോപി എംപി. മുപ്പതിനായിരത്തോളം പേർ അദ്ദേഹത്തിൽ നിന്നും കൈനീട്ടം സ്വീകരിച്ച് വർഷം ഐശ്വര്യ പൂർണ്ണമാക്കി. ഇന്ന് അദ്ദേഹത്തിന്റെ വിഷുക്കൈനീട്ട സമർപ്പണ പരിപാടി തൃശ്ശൂർ ജില്ലയിൽ പൂർത്തിയായി.

നാല് ദിവസമായി വിവിധ മണ്ഡലം കമ്മിറ്റികൾ കേന്ദ്രീകരിച്ചായിരുന്നു വിഷുകൈനീട്ടം പരിപാടി. 26 മണ്ഡലം കമ്മിറ്റികളിലെ ബൂത്ത് പ്രസിഡണ്ട് മാർക്കും പ്രവർത്തകർക്കും കുട്ടികൾക്കും സുരേഷ് ഗോപി വിഷു കൈനീട്ടം നൽകി. ജാതിമതഭേദമന്യേ കുട്ടികൾക്കും മുതിർന്നവർക്കും സുരേഷ് ഗോപി വിഷുക്കൈനീട്ടം നൽകി.

അതേസമയം സുരേഷ് ഗോപിയിൽ നിന്ന് വിഷുക്കൈനീട്ടം സ്വീകരിക്കാൻ നിരവധി കുട്ടികളും എത്തിയിരുന്നു. ജില്ലയിലെ 2200 ബൂത്തുകളിലെ പ്രസിഡണ്ടുമാരും സെക്രട്ടറിമാരും പ്രവർത്തകരും അദ്ദേഹത്തിൽ നിന്നും വിഷുക്കൈനീട്ടം ഏറ്റുവാങ്ങി. ഏപ്രിൽ 8 നാണ് അദ്ദേഹം കൈനീട്ടം നൽകുന്നത് ആരംഭിച്ചത്. കൃഷ്ണ വിഗ്രഹത്തിന് കൈനീട്ടം നൽകിയായിരുന്നു തുടക്കമിട്ടത്.

മാത്രമല്ല ഇരിങ്ങാലക്കുട മണ്ഡലത്തിലെ ബിജെപി പ്രവര്‍ത്തകര്‍ക്കും സുരേഷ് ഗോപി എംപി വിഷുക്കൈനീട്ടം നല്കി. ഇരിങ്ങാലക്കുട മണ്ഡലം കമ്മറ്റിയുടെ നേതൃത്വത്തില്‍ എസ്‌എന്‍ ക്ലബ്ബ് ഹാളില്‍ സംഘടിപ്പിച്ച പരിപാടിയില്‍ ആയിരത്തിലധികം പേര്‍ക്ക് എംപി വിഷുക്കൈനീട്ടവും വിഷുകാര്‍ഡും കണിക്കൊന്നയും നല്കി.

പരിപാടിയില്‍ മണ്ഡലം പ്രസിഡന്റ് കൃപേഷ് ചെമ്മണ്ട അധ്യക്ഷനായി. സംസ്ഥാന വൈസ് പ്രസിഡന്റ് അഡ്വ. ബി. ഗോപാലകൃഷ്ണന്‍ മുഖ്യപ്രഭാഷണം നടത്തി. ജില്ലാ പ്രസിഡന്റ് അഡ്വ. കെ.കെ. അനീഷ്‌കുമാര്‍, ജില്ലാ വൈസ് പ്രസിഡന്റുമാരായ കവിത ബിജു, എന്‍. ആര്‍. റോഷന്‍, ആളൂര്‍ മണ്ഡലം പ്രസിഡന്റ് പി.എസ്. സുഭീഷ്, സ്റ്റേറ്റ് കമ്മറ്റിയംഗം സന്തോഷ് ചെറാക്കുളം തുടങ്ങിയവര്‍ സംസാരിച്ചു.