പ്രധാനമന്ത്രിയുടെ കോയമ്പത്തൂരിലെ റോഡ്ഷോയ്ക്ക് അനുമതി നിഷേധിച്ച് തമിഴ്‌നാട് പോലീസ് ; സുരക്ഷാ ഭീഷണിക്കൊപ്പം പരീക്ഷയുള്ള കുട്ടികളെ ബാധിക്കുമെന്നും വിചിത്ര വിശദീകരണം; മദ്രാസ് ഹൈക്കോടതിയെ സമീപിച്ച് ബിജെപി

പ്രധാനമന്ത്രി നരേന്ദ്രമോദിയുടെ കോയമ്പത്തൂരിലെ റോഡ്ഷോയ്ക്ക് അനുമതി നിഷേധിച്ചു. ബിജെപിയുടെ ലോക്‌സഭാ തെരഞ്ഞെടുപ്പ് പ്രചാരണത്തിന്‍റെ ഭാഗമായി വരുന്ന തിങ്കളാഴ്ച നടത്താനിരുന്ന റോഡ്ഷോയ്ക്കാണ് സുരക്ഷാകാരണങ്ങൾ ചൂണ്ടിക്കാട്ടി പോലീസ് അനുമതി നിഷേധിച്ചിരിക്കുന്നത്. പരീക്ഷയുള്ള കുട്ടികളെ ബാധിക്കുമെന്നതാണ് പോലീസ് നിരത്തുന്ന അടുത്ത കാരണം. കോയമ്പത്തൂര്‍ ടൗണില്‍ നിന്നാരംഭിച്ച് ആർ.എസ്.പുരത്ത് സമാപിക്കുന്ന നാലു കിലോമീറ്റര്‍ ദൈർഘ്യമുള്ള റോഡ്ഷോ നടത്തുന്നതിനാണ് ബിജെപി അനുമതി തേടിയത്. 1998ൽ ബോംബ് സ്ഫോടനം നടന്ന സ്ഥലമാണ് ആർ.എസ് പുരം.

പോലീസ് നടപടിക്കെതിരെ ബിജെപി ഹൈക്കോടതിയെ സമീപിച്ചു. സംഭവത്തില്‍ ഹര്‍ജി പരിഗണിച്ച മദ്രാസ് ഹൈക്കോടതി വൈകുന്നേരം തീരുമാനം അറിയിക്കും. പരീക്ഷയുള്ള കുട്ടികളെ ബാധിക്കുമെന്നും സുരക്ഷാ ഭീഷണി ഉണ്ടെന്നും പോലീസ് കോടതിയെ അറിയിച്ചപ്പോൾ സുരക്ഷാ ഭീഷണി ഉണ്ടെങ്കിൽ എസ്പിജി അനുമതി നൽകുമോ എന്ന് കോടതി ചോദിച്ചു. തങ്ങളുടെ അനുമതിയും വേണമെന്നായിരുന്നു പോലീസിന്‍റെ മറുപടി.