വയനാടിന് അഞ്ച് കോടി അടിയന്തരമായി അനുവദിച്ച് തമിഴ്‌നാട് സർക്കാർ ! ഐഎഎസ് ഉദ്യോഗസ്ഥരുടെ സംഘം ഉടൻ ദുരന്തമുഖത്തേക്ക്

വയനാടിനെ സങ്കടക്കടലിലാക്കിയ ഉരുൾപ്പൊട്ടലിൽ ദുരിതാശ്വാസ സഹായമായി അഞ്ച് കോടി രൂപ അടിയന്തരമായി അനുവദിച്ച് തമിഴ്‌നാട് സർക്കാർ. മലയാളി ഐഎഎസ് ഉദ്യോഗസ്ഥരായ ഡോ.ജി.എസ്.സമീരൻ, ജോണി ടോം വർഗീസ് എന്നിവരുടെ നേതൃത്വത്തിലുള്ള പ്രത്യേക സംഘം ദുരിതാശ്വാസ പ്രവർത്തനങ്ങളും രക്ഷാപ്രവർത്തനങ്ങളും ഏകോപിപ്പിക്കാൻ ഉടൻ വയനാട്ടിലെത്തും.
ഇവർക്കൊപ്പം രക്ഷാപ്രവർത്തകരും വിദഗ്ധ ഡോക്ടർമാർ അടങ്ങുന്ന ആരോഗ്യപ്രവർത്തകരുമുണ്ടാകും. അവശ്യവസ്തുക്കളും സംഘം വയനാട്ടിലെത്തിക്കും.

അതേസമയം മേപ്പാടിയിൽ ഉരുൾപൊട്ടലുണ്ടായ പ്രദേശത്തേക്ക് രക്ഷാപ്രവർത്തനത്തിനായി 200 അംഗ സൈനിക സംഘമെത്തിയിട്ടുണ്ട്. കണ്ണൂരിലെ ഡിഫൻസ് സെക്യൂരിറ്റി കോർപ്‌സ് സെന്ററിൽ നിന്നും കരസേനയുടെ രണ്ട് വിഭാഗമാണ് എത്തിയിരിക്കുന്നത്. കൂടാതെ, കണ്ണൂരിലെ സൈനിക ആശുപത്രിയിൽ നിന്നുള്ള മെഡിക്കൽ സംഘവും കോഴിക്കോട് നിന്നുള്ള ടെറിട്ടോറിയൽ ആർമിയുടെ സംഘവും ദുരന്തമുഖത്ത് എത്തിയിട്ടുണ്ട്.

രക്ഷാപ്രവർത്തനത്തിന് ചൂരൽമലയിലെത്തിയ കോഴിക്കോട് നിന്നുള്ള 150 അംഗ സൈനിക സംഘം മുണ്ടക്കൈയിലേയ്ക്ക് താൽക്കാലിക പാലം നിർമ്മിക്കാനുള്ള സാധ്യതകൾ തേടുകയാണ്. ബെംഗളൂരുവിൽ നിന്നും സൈന്യത്തിന്റെ മദ്രാസ് എൻജിനീയറിംഗ് ഗ്രൂപ്പും വയനാട്ടിലേയ്ക്ക് എത്തും. ഉരുൾപൊട്ടലിൽ തകർന്ന പാലത്തിന് പകരം ബദൽ സംവിധാനത്തിനുള്ള കാര്യങ്ങളാണ് സൈന്യത്തിന്റെ എൻജിനീയറിംഗ് വിഭാഗം നടപ്പാക്കാനൊരുങ്ങുക.