ലക്ഷ്യം ഇറാൻ ! പശ്ചിമേഷ്യയിലേക്ക് വിമാനവാഹിനി കപ്പലയച്ച് അമേരിക്ക ; എത്തുന്നത് അമേരിക്ക- ഇറാഖ് യുദ്ധത്തിലടക്കം പങ്കെടുത്ത യുഎസ്എസ് എബ്രഹാം ലിങ്കൺ

ന്യൂയോർക്ക് : സംഘർഷം അതിരൂക്ഷമായിരിക്കുന്ന പശ്ചിമേഷ്യയിലേക്ക് വിമാനവാഹിനി കപ്പലയച്ച് അമേരിക്ക. ഇസ്രയേൽ ലക്ഷ്യമാക്കി ഇറാൻ മിസൈൽ ആക്രമണം നടത്തിയതിന് തൊട്ട് പിന്നാലെയാണ് അമേരിക്കയുടെ നിർണായക നീക്കം. അമേരിക്കൻ നേവിയുടെ എട്ടാമത്തെ നിമിറ്റ്‌സ് ക്ലാസ് വിമാനവാഹിനി കപ്പലായ യുഎസ്എസ് ഹാരി എസ് ട്രൂ മാനാണ് നിലവിൽ പ്രദേശത്തുള്ളത്. ഇതിന് പുറമെയാണ് യുഎസ്എസ് എബ്രഹാം ലിങ്കൺ എന്ന വിമാന വാഹിനി കപ്പലിനെ കൂടി പ്രദേശത്തേക്ക് അയക്കുന്നത്. ഒരു നിർദ്ദേശം ഉണ്ടാകുന്നതുവരെ കപ്പൽ പ്രദേശത്ത് തന്നെ തുടരുമെന്ന് പ്രതിരോധ സെക്രട്ടറി ലോയിഡ് ഓസ്റ്റിൻ പ്രതികരിച്ചു.

ആണവായുധം വഹിക്കുന്ന എഫ്-35 യുദ്ധ വിമാനങ്ങൾ ഉൾക്കൊള്ളുന്നതാണ് യുഎസ്എസ് എബ്രഹാം ലിങ്കൺ.ലോകത്തെ തന്നെ ഏറ്റവും വലിയ യുദ്ധകപ്പലുകളിൽ ഒന്നാണിത്. ചെങ്കടലിലെ ഹൂതി ആക്രമണങ്ങളുടെ പശ്ചാത്തലത്തിൽ ഈ കപ്പൽ അറേബ്യൻ കടലിൽ നിരീക്ഷണം നടത്തുകയായിരുന്നു. മെഡിറ്ററേനിയൻ തീരവും കപ്പലിന്റെ റഡാർ പരിധിയിൽ വരും. നേരത്തെ അമേരിക്ക- ഇറാഖ് യുദ്ധത്തിന്റെ പശ്ചാത്തലത്തിൽ എബ്രഹാം ലിങ്കൺ മിഡിൽ ഈസ്റ്റിൽ വിന്യസിച്ചിരുന്നു. പിന്നീട് അഫ്ഗാൻ യുദ്ധത്തിന്റെ സമയത്ത് തിരിച്ചുവിളിക്കുകയായിരുന്നു.