പെർത്ത് ബാലമുരുകൻ ക്ഷേത്രത്തിൽ ഭക്തിസാന്ദ്രമായ തൈപ്പൂയ മഹോത്സവം; ജനസാഗരമായി രഥയാത്ര

പെർത്ത് : ഓസ്‌ട്രേലിയയിലെ പെർത്തിലുള്ള ബാലമുരുകൻ ക്ഷേത്രത്തിൽ തൈപ്പൂയ മഹോത്സവം ഭക്തിസാന്ദ്രമായ ചടങ്ങുകളോടെ ആഘോഷിച്ചു. പുലർച്ചെ മുതൽ തന്നെ നൂറുകണക്കിന് ഭക്തജനങ്ങളാണ് മുരുകദർശനത്തിനായും വിശേഷാൽ പൂജകളിൽ പങ്കുചേരാനായും ക്ഷേത്രമുറ്റത്തെത്തിയത്. ഭക്തിനിർഭരമായ അന്തരീക്ഷത്തിൽ നടന്ന അഭിഷേകം, വിശേഷാൽ ദീപാരാധന എന്നിവയിൽ ദൂരദേശങ്ങളിൽ നിന്നുപോലും നിരവധി വിശ്വാസികൾ പങ്കെടുത്തു.

മഹോത്സവത്തിന്റെ പ്രധാന ആകർഷണമായ രഥയാത്ര വൈകുന്നേരം 7:30-നാണ് ആരംഭിച്ചത്. വർണ്ണശബളമായി അലങ്കരിച്ച രഥത്തിൽ മുരുകൻ എഴുന്നള്ളിയപ്പോൾ ഹരഹരോ ഹരഹര വിളികളാൽ അന്തരീക്ഷം മുഖരിതമായി. മുൻവർഷങ്ങളെ അപേക്ഷിച്ച് റെക്കോർഡ് ജനപങ്കാളിത്തമാണ് ഇത്തവണ രഥയാത്രയിൽ അനുഭവപ്പെട്ടത്. പെർത്തിലെ മലയാളി സമൂഹമുൾപ്പെടെയുള്ള പ്രവാസി ഭാരതീയരുടെ സജീവ സാന്നിധ്യം ഉത്സവത്തിന് മാറ്റുകൂട്ടി. പ്രവാസി മണ്ണിലും തനിമ ചോരാതെ നടത്തിയ ഈ ആഘോഷം ഭക്തർക്ക് നവ്യാനുഭവമായി മാറി. ഓസ്‌ട്രേലിയയിലെ ഇന്ത്യൻ പ്രവാസി സമൂഹത്തിന്റെ വളർച്ചയ്ക്കൊപ്പം തന്നെ ഹൈന്ദവ വിശ്വാസങ്ങളിലും ആചാരങ്ങളിലും വലിയ മുന്നേറ്റമാണ് ദൃശ്യമാകുന്നത്. അതിന്റെ ഉത്തമ ഉദാഹരണമായിരുന്നു പെർത്തിലെ ബാലമുരുകൻ ക്ഷേത്രത്തിലെ തൈപ്പൂയ മഹോത്സവത്തിലെ ജനപങ്കാളിത്തം