സംസ്ഥാന സർക്കാരുകൾക്ക് ആശ്വാസം; അഞ്ചു വർഷത്തെ ജിഎസ്ടി നഷ്ടപരിഹാരം പൂർണമായും കേന്ദ്രസർക്കാർ കൊടുത്ത് തീർക്കും;വിതരണം ചെയ്യുക 16,982 കോടി രൂപ !! കേരളത്തിൻെറ നഷ്ടപരിഹാരം എജി സര്‍ട്ടിഫിക്കറ്റ് ഹാജരാക്കുന്ന മുറയ്ക്ക്

ദില്ലി : രാജ്യത്ത് വിവിധ സംസ്ഥാനങ്ങൾക്ക് കേന്ദ്രസർക്കാർ കൊടുക്കാനുള്ള ജിഎസ്ടി നഷ്ടപരിഹാരം മുഴുവനായും നൽകുമെന്ന് കേന്ദ്ര ധനമന്ത്രി നിർമല സീതാരാമൻ വ്യക്തമാക്കി. ഇത്തരത്തിൽ 16,982 കോടി രൂപയാകും വിതരണം ചെയ്യുക.ഇന്ന് നടന്ന 49ാമത് ജിഎസ്ടി കൗൺസിൽ യോഗത്തിലാണ് സംസ്ഥാനങ്ങളുടെ ജിഎസ്ടി നഷ്ടപരിഹാരം ലഭിക്കണമെന്ന നിരന്തര ആവശ്യം, ഉടനടി നടപ്പിലാക്കുമെന്ന തീരുമാനം അറിയിച്ചത്.

തമിഴ്നാട് അടക്കം ആറു സംസ്ഥാനങ്ങളുടെ കുടിശികയായ 16,524 കോടി രൂപയും ഉടനടി നല്‍കാന്‍ തീരുമാനിച്ചു. എജി സര്‍ട്ടിഫിക്കറ്റ് ലഭിക്കുന്ന മുറയ്ക്കാകും കേരളത്തിന്റെ വിഹിതം ലഭ്യമാക്കുക. നഷ്ടപരിഹാര ഫണ്ടിൽ നിലവിൽ ഇത്രയും പണം ഇല്ലെങ്കിലും മറ്റു വരുമാന വിഭവങ്ങളിൽനിന്ന് ഈ തുക വകയിരുത്തുക. ഇതോടെ സംസ്ഥാന സർക്കാരുകൾക്ക് ആശ്വാസമായി കഴിഞ്ഞ അഞ്ചു വർഷത്തെ ജിഎസ്ടി നഷ്ടപരിഹാരം പൂർണമായും ലഭ്യമാകും. ഭാവിയിലെ നഷ്ടപരിഹാര സെസ് പിരിക്കുമ്പോൾ അതിൽനിന്നും ഇതേ തുക തിരിച്ചുപിടിക്കുമെന്നും ധനമന്ത്രി അറിയിച്ചു.

അതെ സമയം കേരളം അടക്കം സംസ്ഥാനങ്ങള്‍ ആവശ്യപ്പെട്ടെങ്കിലും നഷ്ടപരിഹാര കാലാവധി നീട്ടുന്നതില്‍ തീരുമാനമായില്ല. ജിഎസ്ടി തര്‍ക്ക പരിഹാരത്തിനുള്ള അപ്‍ലറ്റ് ട്രൈബ്യൂണലുകളുടെ ഘടന, എണ്ണം എന്നിവയിൽ സംസ്ഥാന സർക്കാരുകൾ വിയോജിപ്പ് രേഖപ്പെടുത്തിയതോടെ അപ്‍ലറ്റ് ട്രൈബ്യൂണലിനായുള്ള മന്ത്രിതല സമിതി ശുപാര്‍ശയില്‍ മാറ്റംവരുത്തും എന്നാണ് റിപ്പോർട്ട്.