ട്രംപിന്റെ മോഹം പൊലിഞ്ഞു !അടുത്ത വർഷത്തെ പ്രസിഡന്റ് തെരഞ്ഞെടുപ്പിൽ മത്സരിക്കുന്നതിൽ നിന്ന് അയോഗ്യനാക്കി കോടതി ! നടപടി യുഎസ് ക്യാപി​റ്റോളിൽ നടന്ന സംഘർഷത്തിൽ പങ്കുണ്ടെന്ന് കണ്ടെത്തിയതോടെ

അടുത്തവർഷം നടക്കുന്ന അമേരിക്കൻ പ്രസിഡന്റ് തെരഞ്ഞെടുപ്പ് പ്രചാരണ പരിപാടികളുമായി മുന്നോട്ട് പോകവേ മുൻ പ്രസിഡന്റ് ഡൊണാൾഡ് ട്രംപിന് കനത്ത തിരിച്ചടി. തെരഞ്ഞെടുപ്പിൽ മത്സരിക്കുന്നതിൽ നിന്ന് മുൻ അമേരിക്കൻ പ്രസിഡന്റ് ഡൊണാൾഡ് ട്രംപിനെ അയോഗ്യനാക്കി. കോളറാഡോ സുപ്രീംകോടതിയുടേതാണ് വിധി. 2021 ജനുവരി ആറിന് നടന്ന യുഎസ് ക്യാപി​റ്റോൾ സംഘർഷത്തിൽ പങ്കുണ്ടെന്ന് കണ്ടെത്തിയതോടെയാണ് ട്രംപിനെതിരായ കടുത്ത നടപടി. 14-ാം ഭേദഗതിയിലെ മൂന്നാം വകുപ്പ് പ്രകാരമാണ് കോടതി വിധി പുറപ്പെടുവിച്ചത്. അട്ടിമറിയുടെയോ അതിക്രമത്തിന്റെയോ പേരിൽ അയോഗ്യനാക്കുന്ന ആദ്യ പ്രസിൻഷ്യൽ സ്ഥാനാർത്ഥിയായി ട്രംപ് മാറി.

അതേസമയം സുപ്രീംകോടതിയുടെ വിധി ജനാധിപത്യവിരുദ്ധമാണെന്നും പിഴവുണ്ടെന്നും ട്രംപ് ക്യാംപെയ്ൻ വക്താവ് പ്രതികരിച്ചു.വിധിക്കെതിരെ യുണൈ​റ്റഡ് സ്​റ്റേ​റ്റ് സുപ്രീം കോടതിയിൽ അപ്പീൽ നൽകിയിട്ടുണ്ടെന്നും സ്​റ്റേ ചെയ്യുന്നതിനുളള നിയമനടപടികൾ സ്വീകരിക്കുന്നുണ്ടെന്നും അദ്ദേഹം വ്യക്താമാക്കി.

കഴിഞ്ഞ തെരഞ്ഞെടുപ്പിന് ശേഷം നിലവിലെ പ്രസിഡന്റ് ജോ ബൈഡൻ സ്ഥാനമേൽക്കുന്നത് മുൻപാണ് യുഎസ് ക്യാപി​റ്റോളിൽ വലിയ സംഘർഷം നടന്നത്. സംഭവത്തിന് പിന്നിൽ ട്രംപാണെന്ന് ആരോപിച്ച് ‘സിറ്റിസൺസ് ഫോർ റെസ്‌പോൺസിബിളിറ്റി ആന്റ് എത്തിക്‌സ്’ന്റെ പിന്തുണയോടെ കോളറാഡോയിലെ ചില വോട്ടർമാരാണ് ട്രംപിനെതിരെ കേസ് നൽകിയത്.

ക്യാപിറ്റോളിൽ നടന്ന കലാപം ട്രംപിനെ അയോഗ്യനാക്കാൻ മാത്രം ഗുരതരമല്ലെന്നും ബാലറ്റിൽ നിന്ന് ട്രംപിനെ നീക്കം ചെയ്യാനുള്ള അധികാരം കോടതിക്കില്ലെന്നുമാണ് ട്രംപിന് വേണ്ടി ഹാജരായ വാദിച്ചത്. അഭിഭാഷകൻ പ്രതികരിച്ചു. എന്നാൽ പ്രതിഭാഗത്തിന് അപ്പീലിന് പോകാനായി ജനുവരി നാല് വരെ വിധി സ്‌റ്റേ ചെയ്തിട്ടുണ്ട്. പ്രസിഡന്റ് തിരഞ്ഞെടുപ്പിനായി പ്രൈമറി ബാലറ്റുകൾ അച്ചടിക്കേണ്ട അവസാന തീയതി ജനുവരി അഞ്ചുവരെയാണ്.