രാജ്യത്ത് വൃദ്ധർ പെരുകുന്നു;ജനന നിരക്ക് കൂട്ടാൻ പതിനെട്ടടവും പയറ്റി ചൈന;പണം നൽകി വിദ്യാർത്ഥികളുടെ ബീജം ശേഖരിക്കുന്നു

ബീജിംഗ് : ജനന നിരക്ക് കൂട്ടാൻ പതിനെട്ടടവും പയറ്റി ചൈന .ജനന നിരക്ക് കൂട്ടാൻ ഇതുവരെ നടത്തിയ ശ്രമങ്ങളൊന്നും വേണ്ടത്ര ഫലം കാണാത്തതിനാൽ പുത്തൻ മാർഗ്ഗം സ്വീകരിക്കുകയാണ് ചൈന. യൂണിവേഴ്സിറ്റി വിദ്യാർത്ഥികൾക്ക് ബീജം ദാനം ചെയ്യാനും ഇതിലൂടെ ചൈനയുടെ ജനസംഖ്യാപരമായ ഭാവി പ്രതിസന്ധി പരിഹരിക്കാൻ സാധിക്കുമെന്നുമാണ് ചൈനീസ് ഭരണകൂടം കണക്കു കൂട്ടുന്നത്.

ബെയ്ജിങ്ങിലും ഷാങ്ഹായിലും ഉൾപ്പെടെ ചൈനയിലുടനീളമുള്ള വിവിധ ബീജദാന ക്ലിനിക്കുകൾ ഇതിനുളള നീക്കം തുടങ്ങി കഴിഞ്ഞു. യൂണിവേഴ്സിറ്റിയിലെ വിദ്യാർത്ഥികളോട് ബീജം ദാനം ചെയ്യാൻ ക്ലിനിക്കുകൾ അഭ്യർത്ഥിച്ചു. ബീജം ദാനം നൽകുന്നവർക്ക് നിരവധി ആനുകൂല്യങ്ങളാണ് ക്ലിനിക്കുകൾ നൽകുന്നത്. റജിസ്ട്രേഷൻ വ്യവസ്ഥകൾ, സബ്‌സിഡികൾ, ബീജദാന നടപടിക്രമങ്ങൾ എന്നിവ എല്ലാം കൃത്യമായി വെളിപ്പെടുത്തിയാണ് വിദ്യാർത്ഥികളെ ക്ഷണിക്കുന്നത്. ചൈനയിലുടനീളമുള്ള മറ്റ് പ്രവിശ്യകളിലെയും നഗരങ്ങളിലെയും ബീജ ബാങ്കുകളെല്ലാം നടപടിയുമായി മുന്നിട്ടിറങ്ങിയിട്ടുണ്ട്.

ചില പ്രത്യേക ഗുണങ്ങളുള്ളവർക്കു മാത്രമേ ബീജം ദാനം ചെയ്യാൻ കഴിയൂ. 20 നും 40 നും ഇടയിൽ പ്രായമുള്ളവരും 165 സെന്റിമീറ്ററിൽ കൂടുതൽ ഉയരമുള്ളവരും പകർച്ചവ്യാധികളോ ജനിതക രോഗങ്ങളോ ഇല്ലാത്തവരും ബിരുദം നേടിയവരോ പഠിക്കുന്നവരോ ആയിരിക്കണമെന്നും നിർദ്ദേശമുണ്ട്. ദാതാവ് ആരോഗ്യ പരിശോധന നടത്തേണ്ടതുണ്ട്, യോഗ്യതയുള്ളവർ 8 മുതൽ 12 തവണ വരെ ബീജം നൽകേണ്ടി വരും. ബീജം നൽകുന്നവർക്ക് 4,500 യുവാൻ ( ഏകദേശം 54,500 രൂപ) പണമായി ലഭിക്കും.കുറഞ്ഞത് 168 സെന്റിമീറ്ററെങ്കിലും ഉയരമുള്ളവർ ബീജം നൽകിയാൽ മതിയെന്നാണ് ഷാങ്‌സി ബീജബാങ്ക് വ്യക്തമാക്കിയിരിക്കുന്നത്. ഇവിടെ 5,000 യുവാൻ (ഏകദേശം 60,000 രൂപ) നൽകുമെന്നാണ് പറയുന്നത്. അതേസമയം, ഷാങ്ഹായിലെ മറ്റൊരു ബീജ ബാങ്ക് 7,000 യുവാൻ (ഏകദേശം 84,000 രൂപ) വരെ വാഗ്ദാനം ചെയ്യുന്നുണ്ട്.