പാലക്കാട് : പാലക്കാട് ആണ്ടിമഠം സ്വദേശികളുടെ കാണാതായ മൂന്ന് പവന്റെ സ്വർണ മാല വിഴുങ്ങിയത് വീട്ടിലെ നായക്കുട്ടി. മാല കാണാതെ വീട്ടുകാർ പല സ്ഥലത്തും തിരഞ്ഞിട്ടും കാണാതെ വന്നതോടെയാണ് മാല നായക്കുട്ടി വിഴുങ്ങിയതാകാം എന്ന സംശയം ഇവര്ക്ക് തോന്നുന്നത്.
തങ്ങള് വീട് വിട്ട് എവിടെയും പോകാത്തതിനാൽ മാല വീട്ടിൽ തന്നെയുണ്ടാകുമെന്ന് കുടുംബത്തിന് ഉറപ്പായിരുന്നു. ഇതിനിടയിൽ പെന്സില് കടിച്ചുകൊണ്ട് തങ്ങളെ നോക്കി വാലാട്ടുന്ന നായക്കുട്ടിയെ കണ്ടതോടെ മാലയും നായക്കുട്ടി വിഴുങ്ങിയോ എന്ന ചിന്ത വീട്ടുകാർക്കുണ്ടായി. തുടർന്ന് എക്സറേ എടുത്ത് നോക്കിയപ്പോഴാണ് സാധനം നായയുടെ വയറ്റില് സുരക്ഷിതമായി തന്നെയുണ്ടെന്ന് വീട്ടുകാര് മനസിലാക്കിയത്. പിന്നാലെ നായ കാഷ്ഠത്തിലൂടെ മാല തിരികെ ലഭിച്ചു എന്നാണ് അറിയാൻ സാധിച്ചത്. എന്തായാലും മാല തിരികെ ലഭിച്ചതിനാലും നായക്കുട്ടിക്ക് മറ്റ് ആരോഗ്യപ്രശ്നങ്ങളൊന്നും ഇല്ലാത്തതുകൊണ്ടും കുടുംബം ഹാപ്പിയാണ്.