കരകയറ്റാൻ …! തുർക്കിക്ക് പിന്നാലെ സിറിയയ്ക്കും ഇന്ത്യയുടെസഹായ ഹസ്തം; വ്യോമസേന വിമാനങ്ങൾ യാത്ര തിരിച്ചു

ദില്ലി : തുർക്കിയ്‌ക്ക് പിന്നാലെ സിറിയയ്‌ക്കും ഇന്ത്യയുടെ സഹായ ഹസ്തം. ജീവൻ രക്ഷാ ഉപകരണങ്ങളും വൈദ്യ സഹായവുമായുള്ള ആദ്യ വ്യോമസേനാ വിമാനം സിറിയയിലേക്ക് യാത്ര തിരിച്ചു. വ്യോമസേനയുടെ സി-130ജെ ഹെർക്കുലീസ് വിമാനം ഹിന്റോൺ എയർ ബേസിൽ നിന്നാണ് യാത്ര തിരിച്ചത്. ദുരിത ബാധിതർക്കാവശ്യമായ 6.5 ടണ്ണിലധികം ജീവൻ രക്ഷാ മരുന്നുകൾ, മറ്റ് അവശ്യ വസ്തുക്കൾ എന്നിവ വിമാനത്തിലുണ്ട്.

ദുരിതമനുഭവിക്കുന്ന രാജ്യങ്ങൾക്ക് സാധ്യമായ സഹായങ്ങൾ എല്ലാം നൽകുമെന്ന് പ്രധാനമന്ത്രി നരേന്ദ്രമോദി നേരത്തെതന്നെ വ്യക്തമാക്കിയിരുന്നു.ഇതിനുപിന്നാലെ തുർക്കിക്ക് നിരവധി സഹായങ്ങൾ ഇന്ത്യ നൽകി. ഇന്നലെത്തന്നെ അപകട സ്ഥലത്തെത്തുകയും രക്ഷാപ്രവർത്തനങ്ങൾ ആരംഭിക്കുകയും ചെയ്തിരുന്നു. നൽകിയ സഹായങ്ങൾക്ക് തുർക്കി എംബസി ഇന്നലെ ‘ സഹായങ്ങൾക്ക് ഇന്ത്യക്ക് നന്ദി’ എന്ന് ട്വീറ്റ് ചെയ്തിരുന്നു.ഭുകമ്പത്തിൽ ദുരിതമനുഭവിക്കുന്ന സിറിയൻ ജനതയ്‌ക്ക് സാധ്യമായ എല്ലാം സഹായവും നൽകുന്നെ് വിദേശകാര്യ സഹമന്ത്രി വി. മുരളീധരനും ഉറപ്പ് നൽകിയിരുന്നു. സിറിയൻ അംബാസഡറുമായി കൂടിക്കാഴ്ചയിലാണ് അദ്ദേഹം പിന്തുണ അറിയിച്ചത്.