നാലുനേരം മതനിരപേക്ഷത പുഴുങ്ങി തിന്നാൽ മതിയെന്നാണ് സർക്കാരിന്റെ നിലപാട് ; സർക്കാർ പരസ്യം പറയുന്നതുപോലയെല്ല കാര്യങ്ങൾ നടക്കുന്നത് ; എല്ലാത്തിലും വർഗീയ ചേരിതിരിവുണ്ടാക്കുകയാണ് പിണറായി സർക്കാരിന്റെ ശ്രമമെന്ന് കെ സുരേന്ദ്രൻ

കോഴിക്കോട്: ജനകീയ പ്രശ്‌നങ്ങളിൽ നിന്ന് ശ്രദ്ധ തിരിക്കാൻ എല്ലാത്തിലും വർഗീയ ചേരിതിരിവുണ്ടാക്കുക എന്നതാണ് പിണറായി സർക്കാരിന്റെ ശ്രമമെന്ന് ബിജെപി സംസ്ഥാന അദ്ധ്യക്ഷൻ കെ സുരേന്ദ്രൻ. കേരളം വലിയ സാമ്പത്തിക പ്രതിസന്ധിയിലൂടെയാണ് കടന്നുപോകുന്നത്. സർക്കാർ പരസ്യം പറയുന്നതുപോലയെല്ല കാര്യങ്ങൾ നടക്കുന്നതെന്നും സുരേന്ദ്രൻ തുറന്നടിച്ചു. കോഴിക്കോട് മാദ്ധ്യമപ്രവർത്തകരോട് സംസാരിക്കുകയായിരുന്നു അദ്ദേഹം.

അതീവ ഗൗരവകരമായ സ്ഥിതിയിലൂടെയാണ് സർക്കാർ കടന്നുപോകുന്നത്. നാലുനേരം മതനിരപേക്ഷത പുഴുങ്ങി തിന്നാൽ മതിയെന്നാണ് സർക്കാരിന്റെ നിലപാടെന്നും കെ സുരേന്ദ്രൻ വിമർശിച്ചു. അതേസമയം, സതീശനും കമ്പനിയും അതിൽ കണ്ണുമടച്ച് വീണിരിക്കുകയാണ്. സംസ്ഥാനത്തെ പദ്ധതികൾ മുടങ്ങി കിടക്കുകയാണെന്നും ഇത്രയും ഗതിക്കെട്ട, നിലവാരമില്ലാത്ത സർക്കാർ വെറെയില്ലെന്നും കെ സുരേന്ദ്രൻ ആരോപിച്ചു.

കൂടാതെ, പിണറായി വിജയനെപ്പോലെ വിഷമുള്ള മറ്റൊരാൾ കേരളത്തിലില്ല. സിപിഎമ്മും പിണറായി വിജയനും നയിക്കുന്ന വഴിയിൽ കൂടി നടക്കേണ്ട ഗതികേടാണ് സതീശനും കൂട്ടർക്കുമുള്ളത്. കേന്ദ്ര ധനകാര്യ മന്ത്രിയ്‌ക്ക് കൊടുത്ത നിവേദനത്തിൽ കേന്ദ്രത്തിൽ നിന്ന് കുടിശ്ശിക കിട്ടാനുണ്ടെന്ന് പറഞ്ഞിട്ടില്ല. എന്നാൽ, വൻകിടക്കാരിൽ നിന്ന് എഴുപതിനായിരം കോടി നികുതി കുടിശ്ശിക കിട്ടാനുണ്ടെന്നാണ് പറഞ്ഞിരിക്കുന്നത്. കെ.എൻ ബാലഗോപാൽ നൽകിയ നിവേദനത്തിലും പുറത്തും പറയുന്ന കാര്യങ്ങളിലും തമ്മിൽ കടലും കടലാടിയും തമ്മിലുള്ള വ്യത്യാസമുണ്ടെന്നും കെ. സുരേന്ദ്രൻ വിമർശിച്ചു.