ശ്രീനഗർ: ജമ്മു കശ്മീരിലെ പൂഞ്ച് ജില്ലയിൽ ഹിന്ദുക്കളെയും സിഖ് വിഭാഗങ്ങളെയും ഭീഷണിപ്പെടുത്തി വീടുകൾക്ക് മുൻപിൽ പോസ്റ്ററുകൾ. കഴിഞ്ഞ ദിവസം വൈകീട്ട് ആറ് മണിയോടെയായിരുന്നു പോസ്റ്ററുകൾ പ്രത്യക്ഷപ്പെട്ടത്. പ്രദേശത്തെ വീടുകളുടെ ചുവരുകളിലാണ് പോസ്റ്ററുകൾ പതിപ്പിച്ചത്. സംഭവത്തിൽ പോലീസ് അന്വേഷണം ആരംഭിച്ചിട്ടുണ്ട്.
ഹിന്ദുക്കളും സിഖ് വിഭാഗങ്ങളും എത്രയും വേഗം നാട് വിടണം എന്നാണ് ഭീഷണി. നിർദ്ദേശം അംഗീകരിച്ചില്ലെങ്കിൽ ശക്തമായ പ്രത്യാഘാതം ആയിരിക്കും ഉണ്ടാകുക എന്നും പോസ്റ്ററിൽ മുന്നറിയിപ്പ് ഉണ്ട്. ഇത് കണ്ട പ്രദേശവാസികൾ ഉടനെ വിവരം പോലീസിനെ അറിയിക്കുകയായിരുന്നു. ഭീകരരാണ് പോസ്റ്ററിന് പിന്നിൽ എന്നാണ് സംശയിക്കുന്നത്. വിവരം ലഭിച്ചയുടൻ പോലീസെത്തി പ്രദേശത്ത് പരിശോധന നടത്തി. ഗ്രാമത്തിൽ സുരക്ഷയ്ക്കായി പോലീസിനെ വിന്യസിച്ചിട്ടുണ്ട്. പോസ്റ്ററുകൾ സ്ഥലത്ത് നിന്നും നീക്കം ചെയ്തിട്ടുണ്ട്.
