എൽഡിഎഫ് സർക്കാർ പുതുതായി ആരംഭിച്ചത് 254 ബാറുകളും 62 ബിയർ വൈൻ പാർലറുകളും; ഒരു പ്രത്യേക തരം മദ്യവർജനം

തിരുവനന്തപുരം: മദ്യവർജന നയവും നിലപാടുകളും നാട് നീളെ പ്രസംഗിച്ചു നടക്കുമ്പോഴും പിണറായി സർക്കാരിന്റെ കാലത്ത് പുതുതായി ആരംഭിച്ചത് 254 ബാറുകളും 62 ബിയർ വൈൻ പാർലറുകളും. 2022 നവംബർ വരെ മൂന്ന് ബവ്റിജസ് ഔട്ട്ലറ്റുകൾ പുതുതായി തുടങ്ങി. 78 ഔട്ട്ലറ്റുകൾക്ക് അനുമതി നൽകിയതിൽ ചിലത് പ്രവർത്തനം തുടങ്ങിയതായി എക്സൈസ് വൃത്തങ്ങൾ അറിയിച്ചു. കൺസ്യൂമർഫെഡ് 5 ഔട്ട്ലറ്റുകൾ 2016ന് ശേഷം പുതുതായി തുടങ്ങി.

പഞ്ചനക്ഷത്രഹോട്ടലുകൾക്ക് മാത്രം അനുമതി നൽകിയാൽ മതിയെന്നായിരുന്നു യുഡിഎഫ് സർക്കാരിന്റെ അവസാനകാലത്തെ മദ്യനയം. 813 ബാറുകളിൽ ബിയറും വൈനും മാത്രമായിരുന്നു അന്ന് വിൽപ്പന. എന്നാൽ എല്‍ഡിഎഫ് സർക്കാർ 2016ൽ അധികാരത്തിൽ വന്നതോടെ മദ്യനയത്തിൽ മാറ്റംവരുത്തി. ത്രീ സ്റ്റാർ ഹോട്ടലുകൾ മുതൽ മുകളിലോട്ടുള്ളവയ്ക്ക് മദ്യവിതരണത്തിന് അനുമതി നൽകി. ഇതനുസരിച്ച് പഴയ ലൈസൻസുള്ള 438 ബാറുകളിൽ മദ്യം വിതരണം ചെയ്തു തുടങ്ങി.

2016–21 കാലഘട്ടത്തിൽ 200 പുതിയ ബാറുകൾക്ക് ഒന്നാം പിണറായി സർക്കാർ അനുമതി നൽകി. 51 ബിയർ–വൈൻ പാർലറുകൾ ഇക്കാലത്ത് പുതുതായി ആരംഭിച്ചു. 2021–23ൽ 54 ബാറുകളാണ് പുതുതായി ആരംഭിച്ചത്. 11 ബിയർ വൈൻ പാർലറുകൾ പുതുതായി തുടങ്ങി. കൺസ്യൂമർഫെഡിന് 44 ഔട്ട്ലറ്റുകളും 3 ബിയർ വൈൻ പാർലറുമുണ്ട്.

നിലവിൽ 721 ബാറുകളും 306 ബവ്റിജസ് ഔട്ട്ലറ്റുകളുമാണ് സംസ്ഥാനത്തുള്ളത്. 372 ത്രീസ്റ്റാർ, 282 ഫോർ സ്റ്റാർ, 49 ഫൈവ് സ്റ്റാർ, 18 ഹെറിറ്റേജ് ബാറുകളുമാണ് സംസ്ഥാനത്ത് പ്രവർത്തിക്കുന്നത്. ബവ്റിജസ് ഔട്ട്ലറ്റുകൾ 78 എണ്ണം പുതുതായി തുടങ്ങാൻ 2022 ഒക്ടോബറിൽ അനുമതി നൽകി.

ഒരു സീമെൻ മറൈൻ ക്ലബ്ബ് കൊച്ചിയിൽ പ്രവർത്തിക്കുന്നു. 44 ക്ലബ്ബുകൾക്ക് ബാർ ലൈസൻസുണ്ട്. 5 എയർപോർട്ട് ലോഞ്ചുകളിലും 41 മിലിട്ടറി കന്റീനുകളിലും 6 പാരാ മിലിട്ടറി കന്റീനുകളിലും 26 വെയർഹൗസുകളിലും 295 ബിയർവൈൻ പാർലറിലും മദ്യം വിതരണം ചെയ്യുന്നുണ്ട്.