കേരളത്തിലെ ബൂത്ത് പ്രവർത്തകരുമായി പ്രധാനമന്ത്രി ഇന്ന് സംവദിക്കും! ഓഡിയോ കോൺഫറൻസ് വൈകുന്നേരം 6 മണിക്ക്

തിരുവനന്തപുരം: കേരളത്തിലെ ബൂത്ത് പ്രവർത്തകരുമായി പ്രധാനമന്ത്രി നരേന്ദ്രമോദി ഇന്ന് സംവദിക്കും. വൈകുന്നേരം 6 മണിക്ക് ഓഡിയോ കോൺഫറൻസിലൂടെയാണ് അദ്ദേഹം പ്രവർത്തകരുമായി സംവദിക്കുക. സുശക്തമാണ് എന്റെ ബൂത്ത് എന്ന പേരിൽ പ്രധാനമന്ത്രി നടത്തുന്ന ആശയവിനിമയ പരിപാടിയുടെ ഭാഗമായിട്ടാണ് കേരളത്തിലെ പ്രവർത്തകരുമായും സംവദിക്കുന്നത്.

കഴിഞ്ഞ ദിവസം തമിഴ്‌നാട്ടിലെ ബൂത്ത് കാര്യകർത്താക്കളുമായി പ്രധാനമന്ത്രി സംവദിച്ചിരുന്നു. കേന്ദ്രസർക്കാർ പദ്ധതികളെക്കുറിച്ചുളള വിവരങ്ങൾ പരമാവധി ജനങ്ങളിലേക്ക് എത്തിക്കണമെന്ന് അദ്ദേഹം നിർദ്ദേശിച്ചു. വോട്ട് നഷ്ടമാകുമെന്ന ഭയത്തിൽ കേന്ദ്ര പദ്ധതികളുടെ ആനുകൂല്യം ജനങ്ങളിലെത്തുന്നത് തടസപ്പെടുത്താനാണ് സ്റ്റാലിൻ സർക്കാർ ശ്രമിക്കുന്നതെന്നും പ്രധാനമന്ത്രി പറഞ്ഞു. ഡിഎംകെ സർക്കാരിനെതിരായ ജനരോഷം ഈ വോട്ടെടുപ്പിൽ പ്രകടമാകുമെന്നും പ്രധാനമന്ത്രി കൂട്ടിച്ചേർത്തു. ഇതിന് പിന്നാലെയാണ് അദ്ദേഹം കേരളത്തിലെ ബൂത്ത് നേതാക്കളുമായി സംവദിക്കാൻ ഒരുങ്ങുന്നത്.

തെരഞ്ഞെടുപ്പ് പ്രഖ്യാപനത്തിന് പിന്നാലെ പത്തനംതിട്ടയിലും പാലക്കാടും എൻഡിഎയുടെ പ്രചാരണ പരിപാടികളിൽ പ്രധാനമന്ത്രി പങ്കെടുത്തിരുന്നു. അതിന് മുൻപ് കൊച്ചിയിലും തൃശ്ശൂരും തിരുവനന്തപുരത്തും നടന്ന പരിപാടികളിൽ പ്രധാനമന്ത്രി എത്തിയത് പാർട്ടി പ്രവർത്തകർക്ക് വലിയ ആവേശമായി.