“ഇന്ത്യയെപ്പോലെ തന്നെ ഞങ്ങളുടെ ശത്രുക്കൾ!!”- പാക് അധീന കശ്മീരിൽ പ്രതിഷേധക്കാരെ വെടിവെച്ചുകൊന്നതിനെ ന്യായീകരിച്ച് പാകിസ്ഥാൻ പ്രതിരോധ മന്ത്രി

ഇസ്‌ലാമാബാദ്: പാക് അധീന കശ്മീരിൽ അവകാശങ്ങൾക്കായി തെരുവിലിറങ്ങിയ സാധാരണക്കാരായ പ്രതിഷേധക്കാർക്ക് നേരെ വെടിവെപ്പ് നടത്തുകയും നിരപരാധികളെ വധിക്കുകയും ചെയ്ത സൈനിക നടപടിയെ ന്യായീകരിച്ച് പാകിസ്ഥാൻ പ്രതിരോധ മന്ത്രി ഖവാജ ആസിഫ്. പ്രതിഷേധിക്കുന്നവരെ ഇന്ത്യയെപ്പോലെ തന്നെ ശത്രുക്കളായാണ് താൻ കാണുന്നതെന്ന് അദ്ദേഹം പ്രതികരിച്ചു. പാക് അധീന കശ്മീരിലെ റാവലാക്കോട്ടിൽ നടന്ന ക്രൂരമായ സൈനിക അടിച്ചമർത്തലിനും വെടിവെപ്പിനും തൊട്ടുപിന്നാലെയാണ് മന്ത്രിയുടെ പ്രകോപനപരമായ പ്രസ്താവന.

മേഖലയിൽ ജനങ്ങൾ തങ്ങളുടെ മൗലികാവകാശങ്ങൾക്കായി സമരം ചെയ്യുമ്പോൾ പാക് ഭരണകൂടം തികഞ്ഞ ക്രൂരതയാണ് കാണിക്കുന്നതെന്ന് ഇന്ത്യ ആരോപിച്ചു. പോലീസും സൈന്യവും നടത്തിയ വെടിവെപ്പുകളിൽ ജൂൺ മാസം മുതൽ ഇതുവരെ എൺപതിലധികം പേർ കൊല്ലപ്പെട്ടതായും നിരവധി പേർക്ക് പരിക്കേറ്റതായും റിപ്പോർട്ടുകളുണ്ട്. ജനവാസ മേഖലകളിലും റോഡുകളിലും മൃതദേഹങ്ങൾ ചിതറിക്കിടക്കുന്ന ഭയാനകമായ സാഹചര്യമാണുള്ളതെന്നും, പരിക്കേറ്റവരെ ആശുപത്രിയിലെത്തിക്കാൻ പോലും ആംബുലൻസുകൾ ലഭ്യമല്ലെന്നും പ്രാദേശികവാസികൾ വെളിപ്പെടുത്തി.

പാക് അധീന കശ്മീരിൽ നടക്കുന്നത് ജനാധിപത്യ പ്രഹസനമാണെന്നും നിരപരാധികളായ കശ്മീരി ജനതയ്ക്ക് നേരെ പാകിസ്ഥാൻ അഴിച്ചുവിടുന്ന അതിക്രമങ്ങളും അടിച്ചമർത്തലുകളും ഉടനടി അവസാനിപ്പിക്കണമെന്നും ഇന്ത്യ ആവശ്യപ്പെട്ടു. ഈ വിഷയത്തിൽ അന്താരാഷ്ട്ര മാദ്ധ്യമങ്ങളും മനുഷ്യാവകാശ സംഘടനകളും മൗനം വെടിഞ്ഞ് അടിയന്തരമായി ഇടപെടണമെന്ന് പ്രാദേശിക പ്രക്ഷോഭകർ അഭ്യർത്ഥിച്ചു.