ഭഗവതിയുടെ പിറന്നാൾ ദിനത്തിൽ ദീപം തെളിയിക്കാൻ ഒഴുകിയെത്തിയത് ആയിരങ്ങൾ; ഭക്തിസാന്ദ്രമായി കാടാമ്പുഴ ഭഗവതിക്ഷേത്രം

മലപ്പുറം : മലപ്പുറം കാടാമ്പുഴ ഭഗവതി ക്ഷേത്രത്തിൽ ഭഗവതിയുടെ പിറന്നാൾ ദിനത്തിൽ ദീപം തെളിയിക്കാനെത്തിയത് ആയിരങ്ങൾ. വൃശ്ചിക മാസത്തിലെ തൃക്കാർത്തിക നാളിലാണ് ഭഗവതിയുടെ പിറന്നാളായി ആഘോഷിക്കുന്നത്. .രണ്ടുവർഷത്തെ കൊറോണ മാരിക്കുശേഷം ഇത്തവണ വിപുലമായ രീതിയിലാണ് ആഘോഷിച്ചത് . കാടാമ്പുഴ ദേവസ്വം ബോർഡിന്റെ ഈ വർഷത്തെ തൃക്കാർത്തിക പുരസ്കാരം തായമ്പക വിദ്വാൻ പെരുവന കുട്ടൻ മാരാർക്ക് സമ്മാനിച്ചു.

പുലർച്ചെ മൂന്നുമണി മുതൽ തന്നെ ക്ഷേത്രത്തിൽ തൃക്കാർത്തിക ദീപം തെളിയിച്ചു. പൂമൂടൽ ഉൾപ്പെടെയുള്ള എല്ലാ പൂജകളും ഈ ദിവസത്തിൽ ദേവസ്വം ബോർഡിന്റെ വകയായിരുന്നു. ഭക്തർക്കായി വിഭവസമൃദ്ധമായ സദ്യയും ഒരുക്കിയിരുന്നു. പ്രത്യേകം സജ്ജമാക്കിയ പന്തലിലായിരുന്നു വിഭവ സമൃദ്ധമായ സദ്യ. ഭഗവതിയുടെ പിറന്നാൾ ദിനമായ ഇന്ന് ഏകദേശം ഇരുപതിനായിരത്തിലധികം പേർ ക്ഷേത്രദർശനം നടത്തി. ഇന്നലെ ആരംഭിച്ച മഹോത്സവം ഇന്ന് പ്രസാദ സദ്യയോടെ അവസാനിക്കും.