ശബരിമല സന്നിധാനത്തു പുലിയിറങ്ങി;പുലിപ്പേടിയിൽ പോലീസ് ജീവനും കൊണ്ടോടി

ശബരിമല : ഇന്ന് പുലർച്ചെ പന്ത്രണ്ടരയോടെ സന്നിധാനത്തിന് പിൻവശത്തെ ബെയ്‌ലി പാലത്തിന് സമീപത്തെ പന്നിക്കുഴിയിൽ പുലിയിറങ്ങി.അവിടെ ഡ്യൂട്ടിയിലുണ്ടായിരുന്ന പോലീസുകാരാണ് ബെയ്‌ലി പാലത്തിന് കുറുകെ ചാടിയ പുലിയെ കണ്ടത് . പാലത്തിൽ ഡ്യൂട്ടിയിലുണ്ടായിരുന്ന രണ്ട് പൊലീസ് ഉദ്യോഗസ്ഥർ ജീവനും കൊണ്ട് പാഞ്ഞു. ഓടി രക്ഷപെട്ട ഇരുവരും പന്നിക്കുഴിക്ക് മുകളിലുള്ള ദേവസ്വം മെസ്സിൽ അഭയം പ്രാപിച്ചു, സംഭവമറിഞ്ഞതോടെ മെസ്സിലെ ജീവനക്കാരടക്കമുള്ളവരും അങ്കലാപ്പിലായി.

തുടർന്ന് അരവണ പ്ലാന്റിന് പിൻവശത്ത് ഡ്യൂട്ടിയിലുണ്ടായിരുന്ന കേന്ദ്രസേനാംഗങ്ങളെത്തി ആകാശത്തേക്ക് നിറയൊഴിച്ച് പന്നിക്കുഴിയിൽ ഒളിച്ച പുലിയെ വിരട്ടി തിരികെ കാടുകയറ്റുകയായിരുന്നു . ദേവസ്വം മെസ്സിലെ ഭക്ഷണാവശിഷ്ടങ്ങൾ ഭക്ഷിക്കാനെത്തുന്ന പന്നികൾ കൂട്ടം കൂടുന്ന ഭാഗമാണ് പന്നിക്കുഴി. പന്നിക്കുട്ടികളെ ലക്ഷ്യം വെച്ചകാം പുലിയെത്തിയതെന്ന നിഗമനത്തിലാണ് പൊലീസ്.