യുക്രെയ്ൻ യുദ്ധം അനന്തമായി നീളുന്നു…ജനസംഖ്യ കുറയുന്നു …..ജനങ്ങളെ പ്രത്യുല്‍പാദനത്തിന് പ്രോത്സാഹിപ്പിക്കാൻ സെക്‌സ് മന്ത്രാലയം തുടങ്ങാനൊരുങ്ങി റഷ്യ

യുക്രെയ്‌നുമായുള്ള യുദ്ധം അനന്തമായി നീളുന്നതിനിടെ രാജ്യത്തെ ജനസംഖ്യ കുറയുന്നതിൽ കടുത്ത ആശങ്കയുമായി റഷ്യ. ജനസംഖ്യയില്‍ കുറവുവന്നതോടെ പ്രത്യുല്‍പാദനത്തിന് പ്രോത്സാഹിപ്പിക്കുന്നതിനായി ഒരു മന്ത്രാലയംതന്നെ രൂപവത്കരിക്കാന്‍ റഷ്യ ആലോചിക്കുന്നതായി റിപ്പോർട്ടുകൾ. ലൈംഗികകാര്യമന്ത്രാലയം രൂപീകരിക്കാൻ റഷ്യ തീരുമാനിച്ചുവെന്നാണ് വിവരം. രാജ്യത്തെ ജനനനിരക്ക് കുറഞ്ഞതോടെയാണ് വ്യത്യസ്തമായ നീക്കത്തിലേക്ക് വ്ളാഡിമിർ പുടിൻ എത്തിയത്. പുടിന്റെ വിശ്വസ്തയും കുടുംബസംരക്ഷണ, പിതൃത്വം, മാതൃത്വം, ശിശുവിഭാ​ഗം എന്നീ വകുപ്പുകൾ നോക്കുന്ന കമ്മിറ്റിയുടെ ചെയന്‍വുമണായ നിന ഒസ്ടാനിനയാണ് ആശയത്തിന് പിന്നിൽ. ‘മിനിസ്ട്രി ഓഫ് സെക്‌സ്’ എന്ന ആശയമാണ് ഇവർ മുന്നോട്ട് വെച്ചത്. ഇവരുടെ ശുപാര്‍ശകള്‍ റഷ്യൻ ഭരണകൂടം പരിഗണിക്കുന്നതായി അന്താരാഷ്ട്ര മാദ്ധ്യമങ്ങള്‍ റിപ്പോര്‍ട്ട് ചെയ്തു.

യുക്രെയ്ൻ യുദ്ധത്തിലൂടെ ജനസംഖ്യയുടെ വലിയൊരു ശതമാനത്തെ റഷ്യക്ക് നഷ്ടമായിരുന്നു. യുദ്ധം ചെയ്യാൻ സൈനികർ കുറവായതിനാൽ ഉത്തരകൊറിയയിൽ നിന്ന് സൈനികരെ എത്തിച്ചതായും റിപ്പോർട്ടുകൾ വന്നു. നിലവിൽ റഷ്യയിലെ ജനനനിരക്ക് 2.1-ല്‍ നിന്ന് 1.5 എന്ന നിലയിലേക്ക് ഇടിഞ്ഞിരുന്നു . പിന്നാലെയാണ് ജനനനിരക്കുയർത്താൻ മന്ത്രാലയം തന്നെ രൂപീകരിക്കാൻ റഷ്യ ആലോചിക്കുന്നത്.