ആശുപത്രികൾക്ക് താഴെ ഹമാസ് ഭീകരവാദികളുടെ ഭൂഗർഭ തുരങ്കങ്ങൾ! തെളിവുകളടങ്ങിയ വീഡിയോ പുറത്ത് വിട്ട് ഐഡിഎഫ്

ടെൽ അവീവ്: സാധാരണക്കാർക്കായി ഒരുക്കിയ ആശുപത്രി സൗകര്യങ്ങളും അടിസ്ഥാന സൗകര്യങ്ങളും ഹമാസ് ഭീകരവാദികൾ ദുരുപയോഗം ചെയ്യുന്നതിന്റെ തെളിവുകൾ പുറത്ത് വിട്ട് ഇസ്രായേൽ ഡിഫൻസ് ഫോഴ്‌സ്. സാധാരണക്കാരെന്ന മട്ടിൽ ആശുപത്രികൾക്കുള്ളിൽ കടന്ന് ഇസ്രായേലിന്റെ സൈനികർക്ക് നേരെ വെടിയുതിർക്കുന്ന ഹമാസ് ഭീകരവാദികളുടെയടക്കമുളള വീഡിയോകളാണ് ഐഡിഎഫ് അന്താരാഷ്‌ട്ര മാദ്ധ്യമങ്ങളുമായി പങ്കുവച്ചത്.

ഹമാസ് ഭീകരരുടെ ഭൂഗർഭ ഒളിത്താവളവുമായി ഷെയ്ഖ് ഹമദ് ആശുപത്രിയെ ബന്ധിപ്പിച്ചിരിക്കുന്നതിന്റെ വീഡിയോയും ഇക്കൂട്ടത്തിലുണ്ട്. ആശുപത്രിക്ക് താഴെയുള്ള ഇത്തരം ഭൂഗർഭ തുരങ്കങ്ങൾ ഭീകരർ അവരുടെ ഒളിത്താവളങ്ങളായി ഉപയോഗിക്കുകയും ചെയ്യുന്നുണ്ടെന്ന് ഐഡിഎഫ് വക്താവ് ഡാനിയേൽ ഹഗാരി പറഞ്ഞു. ആശുപത്രി കെട്ടിടങ്ങൾക്ക് തൊട്ടടുത്ത് തന്നെയായി റോക്കറ്റ് ലോഞ്ചറുകൾ ഉൾപ്പെടെ സ്ഥാപിച്ചിട്ടുണ്ട്. തങ്ങളുടെ കേന്ദ്രങ്ങൾ ലോകത്തിന് മുന്നിൽ മറച്ചു വയ്‌ക്കുന്നതിന് വേണ്ടിയാണ് ഹമാസ് ഇത്തരത്തിലുളള ആശുപത്രികൾ ഉപയോഗിക്കുന്നതെന്ന് ഹഗാരി പറയുന്നു. ആശുപത്രികളിൽ രോഗികൾക്കായി എത്തിച്ചിരിക്കുന്ന ഉപകരണങ്ങളും വസ്തുക്കളും ഹമാസ് ദുരുപയോഗം ചെയ്യുകയാണെന്ന് സ്ഥിരീകരിക്കുന്ന ഫോൺ സംഭാഷണങ്ങളും ഐഡിഎഫ് പുറത്ത് വിട്ടിട്ടുണ്ട്.

ഗാസയിലെ ഏറ്റവും വലിയ ആശുപത്രിയായ ഷിഫ ആശുപത്രിക്ക് താഴെയായി ഹമാസ് അവരുടെ കമാൻഡ് ആൻഡ് കൺട്രോൾ സെന്റർ സ്ഥാപിച്ചതിന് കൃത്യമായ തെളിവുകൾ കിട്ടിയിട്ടുണ്ടെന്ന് ഐഡിഎഫ് പറയുന്നു. ആശുപത്രിയുടെ ആവശ്യങ്ങൾക്കായി എത്തിക്കുന്ന ഇന്ധനശേഖരം ഹമാസ് ഭീകരർ പൂഴ്‌ത്തിവയ്‌ക്കുന്ന അവസ്ഥയാണ്. സാധാരണക്കാരെ പരമാവധി സംരക്ഷിച്ച് കൊണ്ട് തന്നെ ഭീകരരുടെ ഇത്തരം കേന്ദ്രങ്ങൾക്കെതിരായ ആക്രമണം തുടരുമെന്നും ഹഗാരി വ്യക്തമാക്കി.