അമേരിക്കയിൽ തോക്ക് നിയന്ത്രണ ബിൽ യുഎസ് സെനറ്റിൽ പാസാക്കി; കൂട്ടക്കൊലകൾ വർദ്ധിച്ചുവരുന്ന സാഹചര്യത്തിൽ തോക്ക് വിൽപ്പനയിൽ നിയന്ത്രണം ഏർപ്പെടുത്തണമെന്ന ആവശ്യം യുഎസ് സെനറ്റ് അംഗീകരിക്കുകയായിരുന്നു

തോക്ക് നിയന്ത്രണ ബിൽ യുഎസ് സെനറ്റിൽ പാസാക്കി. തോക്ക് ഉപയോഗിച്ചുള്ള കൂട്ടക്കൊലകൾ വർദ്ധിച്ചുവരുന്ന സാഹചര്യത്തിൽ തോക്ക് വിൽപ്പനയിൽ നിയന്ത്രണം ഏർപ്പെടുത്തണമെന്ന ആവശ്യം യുഎസ് സെനറ്റ് അംഗീകരിക്കുകയായിരുന്നു. ചൊവ്വാഴ്ച അവതരിപ്പിച്ച ഗൺ കൺട്രോൾ ബിൽ ഇരുപാർട്ടികളും സമവായത്തിൽ പാസാക്കുകയായിരുന്നു.

ഡെമോക്രാറ്റിക് പാർട്ടിയുടെ 50 അംഗങ്ങൾക്കൊപ്പം റിപ്പബ്ലിക്കൻ പാർട്ടിയിലെ 14 അംഗങ്ങൾ ബില്ലിനെ അനുകൂലിച്ച് വോട്ട് ചെയ്തു. റിപ്പബ്ലിക്കൻ പാർട്ടിയുടെ ഭാഗത്ത് നിന്നും ജോൺ കോന്നന്റെ നേതൃത്വത്തിലുള്ള പാർട്ടി അംഗങ്ങളാണ് ബില്ലിനെ അനുകൂലിച്ചത്. അമേരിക്കൻ പ്രസിഡന്റ് ജോ ബൈഡൻ നേരത്തെ പ്രഖ്യാപിച്ചത് പോലെ തോക്ക് വാങ്ങുന്നതിനുള്ള പ്രായപരിധി 21 ആക്കണമെന്നത് ബില്ലിലില്ല.

21 വയസ്സിന് താഴെയുള്ള തോക്കുവാങ്ങുന്നവരുടെ ജീവിത ശൈലി പരിശോധിക്കണമെന്നും മാനസിക വൈകല്യമുള്ളവരിൽ നിന്നും സമൂഹത്തിന് ഭീഷണി ഉയർത്തുന്നവരിൽ നിന്നും തോക്കുകൾ പിടിച്ചു വാങ്ങുന്നതിനുള്ള വ്യവസ്ഥകളുമാണ് ബില്ലിലുള്ളത്. ഗാർഹിക പീഡന കേസുകളിൽ ഉൾപ്പെട്ടവർക്ക് തോക്ക് വിൽക്കാനാകില്ല. വെള്ളിയാഴ്ച വീണ്ടും ഈ ബില്ല് വോട്ടെടുപ്പിന് വരും. യുഎസ് ഹൗസിൽ ബിൽ പാസ്സാക്കേണ്ടതായുണ്ട്.