ദില്ലി: കേരളത്തിലെ മുതിര്ന്ന ബിജെപി നേതാവും മഹാരാഷ്ട്രയില്നിന്നുള്ള രാജ്യസഭാംഗവുമായ വി. മുരളീധരന് കേന്ദ്രമന്ത്രിയാകും. വ്യാഴാഴ്ച സത്യപ്രതിജ്ഞാ ചടങ്ങിന് മുന്നോടിയായി പ്രധാനമന്ത്രി നരേന്ദ്രമോദി വി. മുരളീധരനെ കൂടിക്കാഴ്ചയ്ക്ക് ക്ഷണിച്ചു. ഇതോടെ കേരളത്തില്നിന്നും കേന്ദ്രമന്ത്രിസഭയില് പ്രാതിനിധ്യമായി.
മന്ത്രിസ്ഥാനം ഒരിക്കലും പ്രതീക്ഷിച്ചിരുന്നില്ലെന്നും അല്പസമയം മുന്പ്് പ്രധാനമന്ത്രിയുടെ ചായസത്കാരത്തിലേക്ക് ക്ഷണം ലഭിച്ചതെന്നും വി. മുരളീധരന് മാധ്യമങ്ങളോട് പ്രതികരിച്ചു.
തലശ്ശേരി സ്വദേശിയായ വി. മുരളീധരന് എബിവിപി യിലൂടെയാണ് രാഷ്ട്രീയത്തിലെത്തുന്നത്. എബിവിപിയുടെ സംസ്ഥാന സെക്രട്ടറിയായും അഖിലേന്ത്യാ ജനറല് സെക്രട്ടറിയായും അദ്ദേഹം പ്രവര്ത്തിച്ചു. പിന്നീട് ബിജെപി യിലും ആര്എസ്എസിലും ശക്തമായ സാന്നിധ്യമായി. ബിജെപിയുടെ സംസ്ഥാന അധ്യക്ഷനായും അദ്ദേഹം പ്രവര്ത്തിച്ചിരുന്നു. ദീര്ഘകാലം ദില്ലി കേന്ദ്രീകരിച്ച് പ്രവര്ത്തിച്ചിരുന്ന വി. മുരളീധരനും നരേന്ദ്രമോദിയും തമ്മില് അടുത്ത ബന്ധമാണുള്ളത്. നേരത്തെ നെഹ്റു യുവകേന്ദ്രയുടെ ചെയര്മാനായും വി. മുരളീധരന് പ്രവര്ത്തിച്ചിട്ടുണ്ട്.
