യുക്രൈനിലേക്ക് വന്ദേ ഭാരത് മിഷൻ; ആദ്യവിമാനം പുറപ്പെട്ടു, യാത്രക്കാരുമായി ഇന്ന് രാത്രി ഡൽഹിയിൽ തിരിച്ചെത്തും

ദില്ലി: യുദ്ധ സാധ്യത നിലനിൽക്കുന്ന യുക്രൈനിൽ നിന്നും ഇന്ത്യക്കാരെ ഒഴിപ്പിക്കാനായി വന്ദേ ഭാരത് മിഷൻ. ദൗത്യത്തിന്റെ ഭാഗമായുള്ള ആദ്യ പ്രത്യേക വിമാനം ഇന്ന് രാവിലെ പുറപ്പെട്ടു. റഷ്യ-യുക്രൈന്‍ സംഘര്‍ഷം പാരമ്യത്തില്‍ നില്‍ക്കെയാണ് ഇന്ത്യന്‍ പൗരന്മാരെ സുരക്ഷിതരായി തിരികെയെത്തിക്കാനുള്ള ഈ നടപടി. കിഴക്കൻ യുക്രൈനിന്റെ വിമത നിയന്ത്രണത്തിലുള്ള ചില ഭാഗങ്ങൾ റഷ്യ പിടിച്ചെടുത്തതായി സൂചനയുണ്ട്. ഇരു രാഷ്ട്രങ്ങളും സംഘർഷത്തിന്റെ വക്കിലായതോടെയാണ് ഇന്ത്യയുടെ നടപടി. നേരത്തെ യുക്രൈനിലുള്ള ഇന്ത്യന്‍ പൗരന്മാരോട് മടങ്ങിവരാന്‍ ഇന്ത്യന്‍ വിദേശകാര്യ മന്ത്രാലയം മുന്നറിയിപ്പ് നല്‍കിയിരുന്നു. 200-ല്‍ അധികം യാത്രക്കാരെ വഹിക്കാന്‍ ശേഷിയുള്ള ഡ്രീംലൈനര്‍ ബി-787 വിമാനമാണ് യുക്രൈനിലേക്ക് പുറപ്പെട്ടത്. ഇന്ത്യക്കാരുമായി വിമാനം ഇന്ന് രാത്രി ഡല്‍ഹിയില്‍ ഇറങ്ങും

യുക്രൈനിലെ ഏറ്റവും വലിയ വിമാനത്താവളമായ ബോറിസ്പില്‍ അന്താരാഷ്ട്ര വിമാനത്താവളത്തിലേക്കും പുറത്തേക്കുമാണ് വിമാനങ്ങള്‍ സര്‍വീസ് നടത്തുക. എയര്‍ ബബിള്‍ ക്രമീകരണത്തിനുകീഴില്‍ യുക്രൈനിലേക്കും പുറത്തേക്കുമുള്ള വിമാനങ്ങളുടെ എണ്ണത്തില്‍ ഇന്ത്യന്‍ സര്‍ക്കാര്‍ നിയന്ത്രണങ്ങള്‍ നീക്കിയതിന് പിന്നാലെ മൂന്ന് വന്ദേ ഭാരത് മിഷന്‍ വിമാനങ്ങള്‍ ഈ മാസംതന്നെ അയക്കുമെന്ന് എയര്‍ ഇന്ത്യ നേരത്തേ പ്രഖ്യാപിച്ചിരുന്നു. ഫെബ്രുവരി 22, 24, 26 തീയതികളിലാണ് വിമാന സര്‍വീസ് ഷെഡ്യൂള്‍ ചെയ്തിരിക്കുന്നത്. യുക്രൈനിലെ ഇന്ത്യക്കാരിൽ ഭൂരിഭാഗവും വിദ്യാർത്ഥികളാണ്. ഇന്ത്യൻ എംബസിയുടെ മുന്നറിയിപ്പ് പരിഗണിച്ച് അതിൽ കുറച്ച് പേർ താൽക്കാലികമായി ഉക്രൈൻ വിടുമെന്നാണ് റിപ്പോർട്ടുകൾ. അവരെ നാട്ടിലെത്തിക്കാനാണ് വന്ദേ ഭാരത് മിഷൻ.