കോവിഡിന്റെ പേരിൽ ഭക്തർക്ക് വിലക്കേർപ്പെടുത്തി പമ്പയിൽ സ്വകാര്യ ട്രസ്റ്റിന് മേള നടത്താൻ അനുമതി നൽകി ദേവസ്വം ബോർഡ്; പമ്പാ മണപ്പുറത്തെ ടൂറിസ്റ്റ് കേന്ദ്രമാക്കരുതെന്ന് വിശ്വഹിന്ദു പരിഷത്ത്; പ്രതിഷേധം ശക്തം

കൊച്ചി: സംസ്ഥാനത്ത് കോവിഡ് രൂക്ഷമായിക്കൊണ്ടിരിക്കുന്ന പശ്ചാത്തലത്തിൽ കർശന നിയന്ത്രണങ്ങളാണ് എല്ലാ മേഖലകളിലും ഏർപ്പെടുത്തിക്കൊണ്ടിരിക്കുന്നത്. എന്നാലിപ്പോൾ കോവിഡിൻ്റെ പേരിൽ ഭക്തജനങ്ങൾക്ക് കർശന നിയന്തണങ്ങൾ ഏർപ്പെടുത്തി ആചാരനുഷ്ടാനങ്ങൾ നടത്താൻ അനുവദിക്കാതെ, പമ്പയിൽ (Pamba) സ്വകാര്യ ട്രസ്റ്റിന് മേള നടത്താൻ അനുമതി നൽകി ദേവസ്വം ബോർഡ്. എന്നാൽ മേള നടത്താൻ അനുവാദം നൽകിയ നടപടിക്കെതിരെ വിശ്വഹിന്ദു പരിഷത്ത് ശക്തമായി രംഗത്തുവന്നിരിക്കുകയാണ്. ഏതു സ്വഭാവത്തിലുള്ള ട്രസ്റ്റാണെന്നു പോലും വൃക്തമാക്കാതെ കോവിഡിൻ്റെ മൂർദ്ധന്യാവസ്ഥയിൽ പമ്പയിൽ ദേവസ്വം ബോർഡിൻ്റെ സൗകര്യങ്ങൾ ഉപയോഗിച്ച് മേള നടത്താൻ അനുമതി നൽകിയതിനെതിരെ ശക്തമായ പ്രക്ഷോഭം നടത്തുമെന്ന് വിശ്വഹിന്ദു പരിഷത്ത് സംസ്ഥാന പ്രസിഡന്റ് വിജി തമ്പിയും ജനറൽ സെക്രട്ടറി
വി ആർ രാജശേഖരനും വ്യക്തമാക്കി.

ഈ മാസം 19 മുതൽ 27 വരെ രാമ കഥാ മേള എന്ന പേരിലാണ് പണം വാങ്ങി കാർണിവൽ നടത്താൻ സ്വകാര്യ ട്രസ്റ്റിന് അനുവാദം നൽകിയിരിക്കുന്നത്. ബലിതർപ്പണം പോലുള്ള ചടങ്ങുകൾക്ക് പമ്പയിൽ വിലക്കേർപ്പെടുത്തിയ ദേവസ്വം ബോർഡും സർക്കാരും ഇത്തരം സ്വകാര്യ ചടങ്ങുകൾക്ക് അനുവാദം നൽകിയതിൻ്റെ പിന്നിലെ രഹസ്യം ഭക്തജനങ്ങളോട് വെളിപ്പെടുത്താൻ തയ്യാറാകണമെന്നും വിശ്വഹിന്ദു പരിഷത്ത് ആവശ്യപ്പെട്ടു. ശബരിമല തീർത്ഥാടന കാലം കഴിഞ്ഞ ശേഷം കോവിഡിൻ്റെ അതി തീവ്ര മൂന്നാം ഘട്ടത്തിൽ നടത്തുവാൻ ഉദ്ദേശിക്കുന്ന ഈ സ്വകാര്യപരിപാടി സംശയാസ്പദമാണെന്നും വിഎച്ച്പി ആരോപിച്ചു. ഇക്കാര്യങ്ങളിൽ ദേവസ്വംബോർഡ് വിജിലൻസ് അന്വേഷണം നടത്തി കൂടുതൽ വ്യക്തത വരുത്തണം എന്നും പ്രസ്താവനയിൽ സംഘടന ആവശ്യപ്പെട്ടു.