ഇതെന്താ ഗുണ്ടാ പാര്‍ട്ടികളുടെ കേരളമോ? എല്‍ഡിഎഫിന്‍റെയും യുഡിഎഫിന്‍റെയും ആക്രമണം: കിഴക്കമ്പലത്ത് പേടിച്ചരണ്ട ദമ്പതികൾ വീട് മാറി

കിഴക്കമ്പലം: കിഴക്കമ്പലത്ത് പോളിംങിനിടെ മർദ്ദനമേറ്റ ദമ്പതികൾ വീട് മാറി. വോട്ടെടുപ്പ് ദിവസം കിഴക്കമ്പലത്ത് എൽഡിഎഫ്, യുഡിഎഫ് പ്രവർത്തകരിൽ നിന്നുണ്ടായ മർദ്ദനത്തിനെത്തുടര്‍ന്നാണ് വയനാട് സ്വദേശികളായ പ്രിന്‍റുവും, ഭാര്യ ബ്രിജീത്തയും വീട് മാറിയത്. ഇരുവരും ഇപ്പോഴും ഭീതിയിലാണ്. കിഴക്കമ്പലത്ത് 14 വർഷമായി വാടകയ്ക്ക് താമസിക്കുകയാണ് പ്രിന്‍റുവും ഭാര്യയും. വാടകയ്ക്ക് താമസിക്കുന്നവരെ വോട്ട് ചെയ്യാന്‍ അനുവദിക്കില്ല എന്ന പേരിലായിരുന്നു യുഡിഎഫിന്‍റെയും എല്‍ഡിഎഫിന്‍റെയും ആക്രമണം. വോട്ട് ചെയ്യാനെത്തിയ ഇരുവരെയും മര്‍ദ്ദിക്കുകയായിരുന്നു. ആധാർ കാർഡ് പോരെന്നും തിരഞ്ഞെടുപ്പ് കമ്മീഷന്‍റെ ഐഡി വേണമെന്നും എൽഡിഎഫ്, യുഡിഎഫ് പ്രവർത്തകർ ശഠിച്ചു. ബൂത്തിലെത്തിയ പ്രിന്‍റുവിന്‍റെ ഷർട്ട് വലിച്ചു കീറുകയും മാല വലിച്ചു പൊട്ടിക്കുകയും ചെയ്തു. ശേഷം വോട്ട് ചെയ്യുന്നില്ല എന്നു പറഞ്ഞിട്ടു പോലും കഴുത്തിനു പിടിച്ചു തള്ളി മര്‍ദ്ദിക്കുകയായിരുന്നു. ഇതിനെത്തുടര്‍ന്നാണ് ഇരുവരും ജോലിചെയ്യുന്ന കിറ്റക്സ് കമ്പനി എടുത്ത് നൽകിയ ഞാറന്നൂരിന് സമീപത്തെ വാടകവീട്ടിലേക്ക് മാറിയത്.

അതേസമയം സംഭവത്തില്‍ ഇന്നലെ പ്രതികളെ പോലീസ് അറസ്റ്റ് ചെയ്തിരുന്നു. കേസിൽ 15 പേരെയാണ് ഇതുവരെ അറസ്റ്റ് ചെയ്തത് ഒരാളെ കൂടി പിടികൂടാനുമുണ്ട്. എന്നാല്‍ അറസ്റ്റിലായവര്‍ക്ക് എതിരെ നിസാര വകുപ്പുകളാണ് ചുമത്തിയിരിക്കുന്നത്. തുടര്‍ന്ന് പ്രതികളെ സിപിഎം നേതാവ് നേരിട്ടെത്തിയാണ് സ്റ്റേഷൻ ജാമ്യത്തിൽ ഇറക്കിയതെന്ന് ട്വന്റി ട്വന്റി ചീഫ് കോ-ഓർഡിനേറ്റർ സാബു എം ജേക്കബ് ആരോപിച്ചു. ഹൈക്കോടതി ഉത്തരവ് ഉണ്ടായിട്ടും വോട്ടെടുപ്പ് ദിവസം തങ്ങളുടെ പ്രവർത്തകർക്ക് വേണ്ട സുരക്ഷാ പോലീസ് ഒരുക്കിയില്ലെന്നും സാബു പറഞ്ഞു. കുമ്മനോട് വാർഡിൽ ട്വന്റി20 ക്കെതിരെ സിപിഎം സ്വതന്ത്ര സ്ഥാനാർത്ഥി യുഡിഎഫ് പിന്തുണയോടെയാണ് മത്സരിച്ചത്.