അനന്ദ്പൂര്: ഇന്ന് തെരഞ്ഞെടുപ്പ് നടക്കുന്ന ആന്ധ്രാപ്രദേശില് വോട്ടിംഗ് യന്ത്രം തകരാറിലായതിനെ തുടർന്ന് സ്ഥാനാര്ത്ഥി യന്ത്രം എറിഞ്ഞുടച്ചു. ജനസേനാ പാര്ട്ടിയുടെ സ്ഥാനാര്ത്ഥി മധുസൂദന് ഗുപ്തയാണ് വോട്ടിംഗ് യന്ത്രം തകരാറായതില് പ്രതിഷേധിച്ച് എറിഞ്ഞുടച്ചത്. അനന്ദ്പൂര് ജില്ലയിലെ ഗൂട്ടി നിയമസഭാ സീറ്റിലെ സ്ഥാനാര്ത്ഥിയാണ് ഇയാള്.
ഇതോടെ സ്ഥാനാര്ത്ഥിയെ പൊലീസ് അറസ്റ്റ് ചെയ്തു. വോട്ട് ചെയ്യാന് പോളിംഗ് ബൂത്തില് എത്തിയതായിരുന്നു ഗുപ്ത. എന്നാല് മെഷീന് തകരാറുണ്ടെന്ന് പറഞ്ഞ് പോളിംഗ് ഉദ്യോഗസ്ഥരോട് കയര്ത്താണ് ഇയാള് വോട്ടിംഗ് യന്ത്രം എറിഞ്ഞുടച്ചത്.
ആന്ധ്രയില് പലയിടങ്ങളിലും വോട്ടിംഗ് യന്ത്രങ്ങള് തകരാറിലായതായാണ് ഇപ്പോള് പുറത്ത് വരുന്ന വാര്ത്തകള്. മാവോയിസ്റ്റ് മേഖലകളിലും വോട്ടിംഗ് യന്ത്രങ്ങള് തകരാറിലായതായാണ് സൂചന. വിശാല ആന്ധ്രയില് മുഴുവന് മണ്ഡലങ്ങളിലേക്കുമുള്ള തെരഞ്ഞെടുപ്പ് നടക്കുകയാണ് ഇന്ന്.
