ദില്ലി: പ്രതിപക്ഷത്തിന് പരാജയഭീതിയാണെന്നും, വോട്ടിംഗ് യന്ത്രങ്ങളെ കുറിച്ച് പരാതിപറയുന്നത് ജനങ്ങളില്‍ വിശ്വാസമില്ലാത്തത് കൊണ്ടാണെന്നും ബിജെപി. ഇവിഎമ്മില്‍ കൂടി വോട്ടെടുപ്പ് നടത്തി വിവിധ തെരഞ്ഞെടുപ്പുകളില്‍ വിജയിച്ച സിപിഎം, തൃണമൂല്‍, ഡിഎംകെ തുടങ്ങിയ പാര്‍ട്ടികള്‍ ഇപ്പോള്‍ പരാതിയുമായി എത്തിയിരിക്കുന്നു. പരാജയപ്പെടും എന്ന ഭീതിയാണ് പ്രതിപക്ഷ പാര്‍ട്ടികള്‍ക്ക് ഉള്ളത്.
ഇവിഎം ഉപയോഗിച്ചു നടത്തിയ രാജസ്ഥാന്‍, മധ്യപ്രദേശ്, കര്‍ണാടക തെരഞ്ഞെടുപ്പുകളില്‍ ഇല്ലാത്ത പരാതികളാണ് ഇപ്പോള്‍ ഉയരുന്നത് എന്നും കേന്ദ്ര മന്ത്രി പ്രകാശ് ജാവ്ദേക്കര്‍ പറഞ്ഞു. വരും മണിക്കൂറുകള്‍ നിര്‍ണായകമാണെന്നും പ്രവര്‍ത്തകര്‍ ജാഗ്രത പാലിക്കണമെന്നും കോണ്‍ഗ്രസ് അധ്യക്ഷന്‍ രാഹുല്‍ ഗാന്ധി ആഹ്വാനം ചെയ്തിരുന്നു. എക്‌സിറ്റ് പോള്‍ ഫലം കണ്ട് നിരാശരാകരുതെന്നും രാഹുല്‍ ട്വീറ്റ് ചെയ്തതിന് പിന്നാലെയാണ് ബിജെപിയുടെ പരിഹാസം.
വോട്ടെണ്ണാന്‍ മണിക്കൂറുകള്‍ ശേഷിക്കേ സ്‌ട്രോങ് റൂമുകള്‍ പ്രതിപക്ഷ പാര്‍ട്ടികളുടെ കനത്ത കാവലിലാണുള്ളത്. വോട്ടിങ് യന്ത്രങ്ങള്‍ സ്‌ട്രോങ്ങ് റൂമില്‍ നിന്നു മാറ്റുന്ന ദൃശ്യങ്ങള്‍ പുറത്തുവന്നതോടെയാണ് പ്രതിപക്ഷം സ്‌ട്രോങ്ങ് റൂമിന് പുറത്ത് കാവലിരിക്കാന്‍ തീരുമാനിച്ചത്.പ്രധാനപ്പെട്ട മണ്ഡലങ്ങളിലെ സ്‌ട്രോങ്ങ് റൂമുകള്‍ക്ക് മുന്നില്‍ ടെന്റ് കെട്ടിയാണ് കാവല്‍.
