എൽദോസ് കുന്നപ്പിള്ളി എംഎൽഎ ഇന്ന് എത്തുമോ ? സ്വന്തം മണ്ഡലമായ പെരുമ്പാവൂരിൽ എത്താൻ സാധ്യത

കൊച്ചി: പീഡനക്കേസിൽ പ്രതിയായതോടെ ഒളിവിൽ പോയ എംഎൽഎ എൽദോസ് കുന്നപ്പിള്ളി ഇന്ന് സ്വന്തം മണ്ഡലമായ പെരുമ്പാവൂരിൽ എത്താൻ സാധ്യത. പീഡനക്കേസിൽ കോഴിക്കോട് അഡീഷണൽ സെഷൻസ് കോടതിയിൽ എംഎൽഎ മുൻകൂർ ജാമ്യത്തിന് അപേക്ഷിച്ചിരുന്നു. ഇതിന് ഇന്നലെ വിധിയായിരുന്നു. മുൻ‌കൂർ ജാമ്യം ലഭിച്ച സാഹചര്യത്തിൽ ഇന്ന് തന്നെ മണ്ഡലത്തിലേക്ക് തിരിച്ചെത്തുമെന്നാണ് സൂചന. കോടതി നിർദേശപ്രകാരം നാളെയാണ് അന്വേഷണ ഉദ്യോഗസ്ഥർക്ക് മുമ്പിൽ എംഎൽഎ ഹാജരാകേണ്ടത്.

അതേസമയം എംഎൽഎ യോട് പാർട്ടി വിശദീകരണം ആവശ്യപ്പെട്ടിരുന്നു. താൻ നിരപരാധിയാണെന്നും കള്ളക്കേസിൽ കുടുക്കിയതാണെന്നുമാണ് എൽദോസ് പാർട്ടിക്ക് നൽകിയിരിക്കുന്ന വിശദീകരണം. എന്നാൽ പരാതിക്ക് പിന്നാലെ ഒളിവിൽ പോയ എംഎൽഎയുടെ നിലപാടിൽ കടുത്ത അമർഷത്തിലാണ് പാർട്ടി നേതാക്കൾ.

യുവതി പീഡന പരാതി നൽകിയതിനെ തുടർന്ന് എംഎൽഎ ഒളിവിലായിരുന്നു. എംഎൽഎ തന്റെ ഫോൺ സ്വിച്ച് ഓഫ് ചെയ്തും പാർട്ടി പരിപാടികളിൽ നിന്നും വിട്ട് നിന്നും പോലീസിന്റെ മുന്നിൽ വരാതെയും ഒളിവിൽ തുടരുകയായിരുന്നു. പരാതിക്കാരി ക്രിമിനൽ ആണെന്നും തനിക്ക് തട്ടിപ്പ് വശമില്ലെന്നും ഫേസ്ബുക്കിലൂടെ എംഎൽഎ പ്രതികരിച്ചിരുന്നു.