കോട്ടയ്ക്കല്: മലപ്പുറത്ത് യുവതിയെ ഭര്തൃവീട്ടില് ആത്മഹത്യ ചെയ്ത നിലയില് കണ്ടെത്തിയ സംഭവത്തില് ഭര്ത്താവ് അറസ്റ്റില്. ചെനയ്ക്കല് ഫാറൂഖ് നഗര് പുളിക്കല് ഹൗസിൽ 31 കാരനായ മുഹമ്മദ് ഷെഫീഖ് ആണ് അറസ്റ്റിലായത്. മാനസികപീഡനം, ആത്മഹത്യാപ്രേരണ എന്നീ കുറ്റങ്ങള് ചുമത്തിയാണ് പോലീസ് അറസ്റ്റ് ചെയ്തത്.
ഇക്കഴിഞ്ഞ 5 ദിവസം മുമ്പാണ് മുഹമ്മദ് ഷെഫീഖിന്റെ ഭാര്യ ഹാറുഷ പര്വീന്(27) ആത്മഹത്യ ചെയ്തത്. ഇരിങ്ങാവൂര് ചക്കാലക്കല് മുഹമ്മദലിയുടെയും ഷക്കീലയുടെയും മകളാണ് ഹാറുഷ. 2017-ല് ഇവരുടെ വിവാഹവേളയില് 125 പവന് സ്വര്ണം ഹാറുഷയുടെ കുടുംബം നല്കിയിരുന്നു. എന്നാൽ ഈ സ്വര്ണമെല്ലാം ഷെഫീഖ് ധൂര്ത്തടിച്ചെന്നാണ് ഹാറുഷയുടെ കുടുംബത്തിന്റെ പരാതി.
