ഇന്ത്യന്‍ അതിര്‍ത്തി കാത്ത് വനിതാ സൈനികരുടെ സംഘം: സ്ത്രീ മുന്നേറ്റത്തില്‍ ലോകത്തിന് ഇന്ത്യന്‍ മാതൃകയെന്ന് ഇന്ത്യന്‍ സേന

ഇറ്റാവ: അരുണാചൽ പ്രദേശ് അതിർത്തി നിയന്ത്രണ രേഖയിൽ ചരിത്രത്തിലാദ്യമായി വനിതകളായ സുരക്ഷാ സൈനികർ മാത്രമുൾപ്പെടുന്ന ടീം നാലുദിവസം തുടർച്ചയായി അതിർത്തി കാത്തു.

പതിനെട്ട് വനിതാ സുരക്ഷാസൈനികരുൾപ്പെടുന്ന ഒരു യൂണിറ്റാണ് അരുണാചൽ പ്രദേശും ചൈനയുമായുള്ള അതിർത്തി നിയന്ത്രണരേഖയിൽ നാലുദിവസം തുടർച്ചയായി റോന്തുചുറ്റല്‍ നടത്തിയത്. ഇന്ത്യൻ കരസേനയിലെ ഒരു വനിതാ ഓഫീസറുടെ നേതൃത്വത്തിൽ കരസേന, ആസാം റൈഫിൾസ്, ഇൻഡോ ടീബറ്റൻ ബോർഡർ പോലീസ് എന്നീ സേനകളിലെ തിരഞ്ഞെടുത്ത പതിനെട്ട് വനിതാ സൈനികരാണ് ചരിത്രപ്രധാനമായ ദൗത്യം പൂർത്തിയാക്കിയത്.

ഹിമാലയൻ മലനിരകളിലെ അതിർത്തിയിൽ റോന്തുചുറ്റുന്ന ആദ്യ വനിതാ സുരക്ഷാസൈനികരായി ഇവർ ചരിത്രത്താളുകളിൽ തങ്ങളുടെ നാമം കൊത്തിവച്ചെന്നും നാരീശക്തിയുടെ അതിഗംഭീരമായ ആന്തരികശക്തിയുടെ സാദ്ധ്യതകളാണ് ഇതിലൂടെ വെളിവായതെന്നും പ്രതിരോധമന്ത്രാലയത്തിന്‍റെ ഔദ്യോഗിക പത്രക്കുറിപ്പ് അറിയിച്ചു.

കിഴക്കാംതൂക്കായ മലനിരകളും വെള്ളച്ചാട്ടങ്ങളും നിബിഢവനവുമുള്ള ഈ അതിർത്തിമേഖലയിലൂടെ ദൃഢനിശ്ചയത്തോടെ മറ്റാരേയും പോലെതന്നെ ഈ യൂണിറ്റ് തങ്ങളുടെ നാലുദിവസ റോന്തുചുറ്റൽ വിജയകരമായി പൂർത്തിയാക്കുമ്പോൾ ഭാരതത്തിന്‍റെ വീരപുത്രന്മാരെപ്പോലെതന്നെ വീരപുത്രിമാരും തങ്ങൾ ഒന്നിനും പിറകിലല്ല എന്ന് തെളിയിച്ചിരിയ്ക്കുകയാണ്.

സ്വാതന്ത്ര്യത്തിന്‍റെ എഴുപത്തിമൂന്നാം വർഷത്തിൽ സ്ത്രീശാക്തീകരണത്തിന്‍റെയും ലിംഗസമത്വത്തിന്‍റെയും ലോകോത്തര മാതൃകയായി നാം മാറിയെന്ന് ഔദ്യോഗിക പത്രക്കുറിപ്പിൽ അറിയിയ്ക്കുന്നു.

ഈ സൈനികരുടെ ആത്മാർത്ഥതയേയും ദൃഢനിശ്ചയത്തേയും കരസേനാ ഈസ്റ്റേൺ കമാൻഡ് ജനറൽ ഓഫീസർ ഇൻ കമാൻഡ് ലഫ്റ്റനന്‍റ് ജനറൽ എം എം നാരവാണേ അഭിനന്ദിച്ചു.