യോഗിയും അക്ഷയ് കുമാറും ഭായ് ഭായ്… ഒന്നിച്ച് അത്താഴമുണ്ടു; ചലച്ചിത്രവും സംസ്ക്കാരവും ചർച്ച ചെയ്തു

ബോളിവുഡ് താരം അക്ഷയ് കുമാറുമായി കൂടിക്കാഴ്ച്ച നടത്തി ഉത്തർപ്രദേശ് മുഖ്യമന്ത്രി യോഗി ആദിത്യനാഥ്. രാജ്യത്തെ ഏറ്റവും വലിയ ഫിലിം സിറ്റി ഉത്തർപ്രദേശിൽ സ്ഥാപിക്കുന്നതിനായുള്ള പ്രവർത്തനങ്ങളുടെ ഭാഗമായാണ് അദ്ദേഹം അക്ഷയ് കുമാറുമായി കൂടിക്കാഴ്ച്ച നടത്തിയത്. മുംബൈയിലെ ട്രൈഡെന്റ് ഹോട്ടലിൽ വെച്ചായിരുന്നു കൂടിക്കാഴ്ച്ച.

ചലച്ചിത്ര മേഖലയിലെ വീക്ഷണങ്ങളെ കുറിച്ച് ഇരുവരും ചർച്ച നടത്തി. രാം സേതു സിനിമയെ കുറിച്ചും ചർച്ച ചെയ്തു. രാം സേതുവിന്റെ ചിത്രീകരണം നടത്താനായി അദ്ദേഹം അക്ഷയ് കുമാറിനെ അയോദ്ധ്യയിലേക്ക് ക്ഷണിക്കുകയും ചെയ്തു. ഫിലിം സിറ്റി സ്ഥാപിക്കുന്നതിനെ കുറിച്ചുള്ള കാര്യങ്ങളും യോഗി ആദിത്യനാഥ് അക്ഷയ് കുമാറുമായി ചർച്ച നടത്തി. അക്ഷയ് കുമാറിനൊപ്പം അദ്ദേഹം അത്താഴവിരുന്നിലും പങ്കെടുത്തു.

2018-ലെ ഫിലിം പോളിസി പ്രകാരം ചലച്ചിത്ര നിര്‍മാണമേഖലയ്ക്ക് ഊന്നല്‍ നല്‍കിയുള്ള വികസനമാണ് ഞങ്ങള്‍ ലക്ഷ്യമിടുന്നത്. ബോളിവുഡ് ചിത്രങ്ങള്‍ യു.പിയില്‍ കേന്ദ്രീകരിക്കുന്നതോടെ പ്രാദേശിക ഭാഷയിലെ അഭിനേതാക്കള്‍ക്ക് കഴിവുകള്‍ പ്രദര്‍ശിപ്പിക്കാന്‍ അവസരവും വരുമാനമാര്‍ഗ്ഗവും ലഭിക്കും. യു.പിയില്‍ ചിത്രീകരണം നടത്താന്‍ എല്ലാവിധ സൗകര്യങ്ങളും നിര്‍മാതാക്കള്‍ക്കും സംവിധായകര്‍ക്കു ഒരുക്കുമെന്നും യോഗി ആദിത്യനാഥ് പറഞ്ഞു.

ദ്വിദിന സന്ദർശനത്തിനായി ഇന്ന് രാത്രി 7.30 ഓടെയാണ് യോഗി ആദിത്യനാഥ് മുംബൈയിലെത്തിയത്. ഫിലിംസിറ്റിയുടെ പ്രവർത്തനവുമായി ബന്ധപ്പെട്ട കാര്യങ്ങൾ ചർച്ച നടത്താനായി നാൽപ്പതിലധികം ബോളിവുഡ് താരങ്ങളുമായി യോഗി ആശയ വിനിമയം നടത്തും.

അക്ഷയ് കുമാറിന്റെ ഏറ്റവും പുതിയ ചിത്രമാണ് രാം സേതു. ദീപാവലി ദിനത്തിലാണ് ചിത്രത്തിന്റെ ഫസ്റ്റ് ലുക്ക് പോസ്റ്റർ റിലീസ് ചെയ്തത്. അഭിഷേക് ശർമ്മയാണ് ചിത്രത്തിന്റെ സംവിധായകൻ. അക്ഷയ് കുമാറിന്റെ കേപ് ഓഫ് ഗുഡ് ഫിലിംസാണ് ചിത്രം നിർമ്മിക്കുന്നത്.