നെയ്യാറ്റിൻകര: യൂട്യൂബ് ചാനൽ വഴി മതസ്പർധ വളർത്തുന്ന വീഡിയോ പ്രചരിപ്പിച്ച അവതാരകൻ പിടിയിൽ(Youth Arrested For Spread Hate Content Through Youtube). നെയ്യാറ്റിൻകര, മണലൂർ കണിയാംകുളം കുളത്തിൻകര വീട്ടിൽ ഇരുമ്പലിന് സമീപം വയലത്തറ വീട്ടിൽ വാടകയ്ക്ക് താമസിക്കുന്ന ബാദുഷ ജമാൽ (32) ആണ് അറസ്റ്റിലായത്. മുൻപും മതസ്പർധ വളർത്തുന്ന തരത്തിലുള്ള വാർത്തകൾ പ്രതി ചാനൽ വഴി പ്രചരിപ്പിച്ചിരുന്നതായി പോലീസ് കണ്ടെത്തിയിട്ടുണ്ട്.
മതസ്പർധ വളർത്തുന്ന വീഡിയോ യൂട്യൂബ് ചാനൽ വഴി വാർത്തയായി ജമാൽ അവതരിപ്പിക്കുകയായിരുന്നു.
പ്രദേശത്ത് ഉണ്ടായ സംഭവത്തെ പ്രതി ഡെമോക്രസി എന്ന യൂട്യൂബ് ചാനൽ വഴിയാണ് തെറ്റായി ഇയാൾ പ്രചരിപ്പിച്ചത്.
ഒരാഴ്ച മുൻപ് വഴിമുക്ക് പച്ചിക്കോട് നിസാം മൻസിലിൽ നിസാം ,ഭാര്യ ആൻസില,രണ്ടുവയസുള്ള ഇവരുടെ മകൻ എന്നിവരെ സമീപവാസികൾ ആക്രമിച്ച സംഭവമുണ്ടായി. ഇതിൽ നെയ്യാറ്റിൻകര പോലീസ് കേസ് എടുത്തെങ്കിലും പ്രതികളെ പിടികൂടിയിരുന്നില്ല. ഈ സംഭവത്തെയാണ് പ്രതി മതസ്പർധ വളർത്തുന്ന രീതിയിൽ ചാനലിലൂടെ പ്രചരിപ്പിച്ചത്. കേസിൽ പ്രതികള് പ്രത്യേക മതവിഭാഗക്കാരായതിനാലാണ് അറസ്റ്റ് വൈകുന്നതെന്ന് ബാദുഷ വീഡിയോയിൽ ആരോപിച്ചിരുന്നു. തുടർന്ന് സംഭവത്തിൽ നിരവധി പരാതികൾ ഉയർന്നതിനെത്തുടർന്ന് പോലീസ് കേസെടുക്കുകയായിരുന്നുവെന്നാണ് വിവരം.
