തിരുവനന്തപുരം: കേരളത്തിൽ രോഗവ്യാപനം കൂടുന്ന പശ്ചാത്തലത്തിൽ സംസ്ഥാനം വീണ്ടും സമ്പൂർണ ലോക്ക്ഡൗണിലേയ്ക്ക് പോകുന്നുവെന്ന് സൂചന നൽകി മുഖ്യമന്ത്രി പിണറായി വിജയൻ. ‘”സമ്പൂർണ്ണ ലോക്ക്ഡൗൺ നേരത്തെ നടത്തി. ഇത്തരം അഭിപ്രായം വീണ്ടും വരുന്നുണ്ട്. അത് ഗൗരവമായി പരിഗണിക്കേണ്ടി വരുമെന്നാണ് തോന്നുന്നത്”, മുഖ്യമന്ത്രി പറഞ്ഞു. എന്നാൽ നിലവിൽ സമ്പൂർണ ലോക്ക്ഡൗൺ തീരുമാനിച്ചിട്ടില്ലെന്നും മുഖ്യമന്ത്രി കോവിഡ് അവലോകന യോഗത്തിന് ശേഷം പറഞ്ഞു.
സർവകക്ഷി യോഗത്തിൽ സമ്പൂർണ ലോക്ക്ഡൗൺ വിഷയം ചർച്ച ചെയ്യുമെന്നാണ് സൂചന. വീഡിയോ കോൺഫറൻസിംഗ് വഴി സർവകക്ഷി യോഗം സർക്കാർ വിളിച്ച് ചേർത്തിട്ടുണ്ട്. അങ്ങനെയെങ്കിൽ ഈ ആഴ്ച അവസാനത്തോടെയോ അടുത്ത ആഴ്ച ആദ്യമോ സംസ്ഥാനം സമ്പൂർണ ലോക്ക്ഡൗണിലേയ്ക്ക് നീങ്ങും.
നിലവിൽ സംസ്ഥാനത്തിന്‍റെ അതിർത്തികൾ അടച്ചിട്ടിരിക്കുകയാണ്. അടിയന്തര ആവശ്യങ്ങൾക്ക് വേണ്ടി മാത്രം ജാഗ്രത പോർട്ടലിൽ നിന്ന് പാസ്സ് ഉറപ്പായി ലഭിച്ചതിന് ശേഷം മാത്രമേ ഇപ്പോൾ ആളുകൾക്ക് അതിർത്തി കടക്കാനാകൂ.
