10,000 കോടിയുടെ കപ്പൽ നിർമ്മാണ പദ്ധതി: മുഖ്യമന്ത്രി വി.ഡി. സതീശന്റെ അവകാശവാദം തള്ളി ടാറ്റ ഗ്രൂപ്പ്

തിരുവനന്തപുരം: കേരളത്തെ വലിയൊരു സമുദ്ര ശക്തിയാക്കി മാറ്റുകയെന്ന ലക്ഷ്യത്തോടെ ‘മിഷൻ സമുദ്ര’ പദ്ധതിയുടെ ഭാഗമായി 10,000 കോടി രൂപയുടെ നിക്ഷേപം നടത്താൻ സന്നദ്ധത അറിയിച്ചിട്ടുണ്ടെന്ന മുഖ്യമന്ത്രി വി.ഡി. സതീശന്റെ അവകാശവാദം തള്ളി ടാറ്റാ ഗ്രൂപ്പ് . കേരളത്തിൽ കപ്പൽ നിർമ്മാണ ശാല ആരംഭിക്കുന്നതിനായി അത്തരം ഒരു നിക്ഷേപ താത്പര്യവും തങ്ങൾ പ്രകടിപ്പിച്ചിട്ടില്ലെന്ന് ടാറ്റാ ഗ്രൂപ്പ് ഔദ്യോഗികമായി വ്യക്തമാക്കി. മുഖ്യമന്ത്രിയുടെ പ്രസ്താവന തന്നെ അമ്പരപ്പിച്ചുവെന്നാണ് ടാറ്റാ ഗ്രൂപ്പിലെ ഉന്നത ഉദ്യോഗസ്ഥരെ ഉദ്ധരിച്ച് ദേശീയ മാദ്ധ്യമമായ ഇക്കണോമിക് ടൈംസ് റിപ്പോർട്ട് ചെയ്തത്.

കേരളത്തിൽ മാത്രമല്ല, രാജ്യത്ത് മറ്റൊരിടത്തും നിലവിൽ ഒരു കപ്പൽ നിർമ്മാണ ശാല സ്ഥാപിക്കാൻ തങ്ങൾക്ക് പദ്ധതിയോ നിക്ഷേപമോ ഇല്ലെന്ന് ടാറ്റ വ്യക്തമാക്കുന്നു. സ്റ്റീൽ, മോട്ടോർ, ഷിപ്പിംഗ് തുടങ്ങിയ വിവിധ മേഖലകളിൽ ശക്തമായ സാന്നിധ്യമുള്ള ടാറ്റയ്ക്ക് നിലവിൽ സ്വന്തമായി കപ്പൽ നിർമ്മാണ ശാലകളൊന്നുമില്ല. വിഴിഞ്ഞം പദ്ധതിക്ക് പിന്നാലെ വലിയൊരു കപ്പൽ നിർമ്മാണ ശാലയ്ക്കായി പ്രാരംഭഘട്ടത്തിൽ രണ്ട് കിലോമീറ്റർ തീരപ്രദേശവും രണ്ടായിരം ഏക്കറോളം സ്ഥലവും ഏറ്റെടുക്കേണ്ടതുണ്ട്. എന്നാൽ രാജ്യത്തെ സമുദ്ര ശക്തിയാക്കി മാറ്റാനുള്ള കേന്ദ്ര സർക്കാരിന്റെ എഴുപതിനായിരം കോടിയുടെ ബൃഹദ് പദ്ധതികളിൽ പോലും കേരളത്തിൽ ഇതുവരെ കാര്യമായ ചലനങ്ങളൊന്നും ഉണ്ടായിട്ടില്ലാത്ത സാഹചര്യത്തിലാണ് മുഖ്യമന്ത്രിയുടെ ഈ അവകാശവാദം വിവാദത്തിലായിരിക്കുന്നത്.