പെരിയ ഇരട്ടക്കൊലപാതകക്കേസിൽ സിപിഎം പങ്ക് തെളിഞ്ഞു; സിബിഐ അന്വേഷണം തടയാൻ പിണറായി സർക്കാർ സുപ്രീംകോടതി വരെ പോയി; സിപിഎം നേതാക്കളും പ്രവർത്തകരുമായ 14 പ്രതികൾ കുറ്റക്കാർ

കൊച്ചി: പെരിയ ഇരട്ടക്കൊലപാതകക്കേസിൽ സിപിഎം പങ്ക് തെളിഞ്ഞു. സിപിഎം നേതാക്കളും പ്രവർത്തകരുമായ 14 പ്രതികൾ കുറ്റക്കാരെന്ന് പ്രത്യേക സിബിഐ കോടതി വിധിപറഞ്ഞു. 24 പ്രതികളാണ് കേസിൽ ഉണ്ടായിരുന്നത്. 10 പേരെ തെളിവുകളുടെ അഭാവത്തിൽ കുറ്റവിമുക്തരാക്കി. സിപിഎം പെരിയ മുൻ ലോക്കൽ കമ്മിറ്റിയംഗം എ പീതാംബരൻ, സിപിഎം നേതാവും ബ്ലോക്ക് പഞ്ചായത്ത് പ്രസിഡന്റ് കെ മണികണ്ഠൻ, മുൻ സിപിഎം എംഎൽഎ കെ വി കുഞ്ഞിരാമൻ അടക്കമുള്ള 14 സിപിഎംകാരാണ് കുറ്റക്കാർ. കൊലപാതകവും ഗൂഢാലോചയും തെളിഞ്ഞതായി കോടതിവിധിയിലുണ്ട്.

സംസ്ഥാന പോലീസും ക്രൈം ബ്രാഞ്ചും കേസന്വേഷണം അട്ടിമറിക്കുന്നു എന്ന ആരോപണത്തെ തുടർന്ന് ശരത്തിന്റെയും കൃപേഷിന്റേയും കുടുംബങ്ങൾ സിബിഐ അന്വേഷണം ആവശ്യപ്പെട്ട് നിയമ പോരാട്ടം നടത്തിയിരുന്നു. സിബിഐ അന്വേഷണം വരാതിരിക്കാൻ സർക്കാർ വലിയ ശ്രമങ്ങൾ നടത്തിയിരുന്നു. പൊതുഖജനാവിൽ നിന്ന് കോടിക്കണക്കിന് രൂപ ചെലവാക്കി സിബിഐ അന്വേഷണം തടയാൻ സർക്കാർ സുപ്രീംകോടതി വരെ പോയിരുന്നു. എന്നാൽ കോടതി വിധി കുടുംബത്തിന് അനുകൂലമായിരുന്നു. സിബിഐ വന്നതിന് ശേഷമാണ് ഉന്നത സിപിഎം നേതാക്കൾ അടക്കം പ്രതിപ്പട്ടികയിൽ വന്നത്.

2019 ഫെബ്രുവരി മാസം 17 നാണ് യൂത്ത് കോൺഗ്രസ് പ്രവർത്തകരായ കൃപേഷും ശരത്ലാലും കൊല്ലപ്പെട്ടത്. സിപിഎം പാർട്ടിഗ്രാമമായ പെരിയയിൽ ഉണ്ടായ തർക്കങ്ങളാണ് കൊലപാതകത്തിൽ കലാശിച്ചത്. റിമാന്റിലുണ്ടായിരുന്ന പ്രതികൾക്ക് ജാമ്യം അടക്കം നിഷേധിച്ച് വിചാരണ പൂർത്തിയാക്കാൻ സിബിഐ അന്വേഷണ സംഘത്തിന് കഴിഞ്ഞിരുന്നു. 10 പ്രതികളെ വെറുതെ വിട്ടതിനെതിരെ അപ്പീൽ പോകുമെന്നും നിയമ പോരാട്ടം തുടരുമെന്നും കുടുംബങ്ങൾ അറിയിച്ചു.