കല്പറ്റ : വയനാട് കല്പറ്റയിലെ മുസല്ല എന്ന ഹോട്ടലില് നിന്നും ഭക്ഷണം കഴിച്ച 22 പേര്ക്ക് ഭക്ഷ്യവിഷബാധയേറ്റു .സംഭവത്തെത്തുടർന്ന് ഹോട്ടല് നഗരസഭ അടപ്പിച്ചു.
ഭക്ഷ്യസുരക്ഷാ വിഭാഗവും നഗരസഭാ ആരോഗ്യവിഭാഗവും നടത്തിയ പരിശോധനയില് ഹോട്ടലില് നിന്ന് വൃത്തിഹീനമായ സാഹചര്യത്തില് സൂക്ഷിച്ച ഭക്ഷ്യവസ്തുക്കള് പിടികൂടി. ഇറച്ചിയുള്പ്പടെയുള്ള ഭക്ഷ്യവസ്തുക്കള് വൃത്തിഹീനമായ സാഹചര്യത്തിലാണ് സൂക്ഷിച്ചിരിക്കുന്നതെന്ന് പരിശോധനയില് കണ്ടെത്തിയതായി ആരോഗ്യ വകുപ്പ് അധികൃതര് അറിയിച്ചു
ഇന്നലെ രാത്രി ഒമ്പതു മണിയോടെ ഇവിടെ നിന്ന് ഭക്ഷണം കഴിച്ചവർക്കാണ് ഭക്ഷ്യ വിഷബാധയേറ്റിരിക്കുന്നത്. ഇതില് ഒരു കുടുംബത്തില് നിന്നുള്ള പതിനഞ്ച് പേരുണ്ട്. ഏഴു പേര് കോഴിക്കോട് ജില്ലയില് നിന്നുള്ളവരാണ്
വിഭവങ്ങള് തയ്യാറാക്കാനുള്ള മസാലക്കൂട്ടുകള് ഹോട്ടലിന് പുറത്ത് മറ്റൊരിടത്തു നിന്ന് തയ്യാറാക്കിയാണ് എത്തിച്ചിരുന്നത്. അതിനാൽ അതിന്റെ പഴക്കവും മറ്റും നിര്ണയിക്കാന് കഴിഞ്ഞില്ലെന്ന് ഉദ്യോഗസ്ഥര് വ്യക്തമാക്കി. പ്രാഥമിക നടപടിയെന്ന് നിലയില് ഹോട്ടല് അടച്ചിടാന് നിര്ദ്ദേശം നല്കിയിട്ടുണ്ട്. മറ്റു നടപടികള് പിന്നാലെയുണ്ടാകുമെന്നാണ് ആരോഗ്യ, ഭക്ഷ്യസുരക്ഷാ വകുപ്പ് അധികൃതർ വ്യക്തമാക്കിയത്.