പനാജി: പൗരത്വ ഭേദഗതി നിയമത്തിനെതിരായ പ്രതിഷേധത്തിൽ കോണ്‍ഗ്രസിനെ പ്രതിരോധത്തിലാക്കി നേതാക്കളുടെ കൊഴിഞ്ഞുപോക്ക്. ഗോവയിൽ പൗരത്വ ഭേദഗതി നിയമത്തിലെ കോണ്‍ഗ്രസ് നിലപാടിൽ പ്രതിഷേധിച്ച് നാല് നേതാക്കൾ പാർട്ടി വിട്ടു. ഇതിൽ മൂന്ന് പേർ ബിജെപിക്കൊപ്പം ചേർന്നു.
പനാജി കോണ്‍ഗ്രസ് മുൻ ബ്ലോക്ക് കമ്മിറ്റി പ്രസിഡന്‍റ് പ്രസാദ് അമോങ്കർ, മുൻ ബ്ലോക്ക് കമ്മിറ്റി സെക്രട്ടറി ദിനേഷ് കുബാൽ, മുൻ യുവജന നേതാവ് ശിവ്‌രാജ് താർക്കർ, വടക്കൻ ഗോവ ന്യൂനപക്ഷ സെൽ മേധാവി ജാവേദ് ശൈഖ് എന്നിവരാണ് പാർട്ടി വിട്ടത്. ഇവരിൽ അമോങ്കർ, കുബാൽ, താർക്കർ എന്നിവരാണ് ബിജെപിയിൽ ചേർന്നത്.
മൂന്നു പേരെയും ബിജെപി പാർട്ടിയിലേക്ക് സ്വാഗതം ചെയതു. പൗരത്വ ഭേദഗതി നിയമവുമായി ബന്ധപ്പെട്ട് ഗോവയിൽ ബിജെപി വർക്കിംഗ് പ്രസിഡന്‍റ് ജെ പി. നഡ്ഡയുടെ നേത്യത്വത്തിൽ വൻ റാലി നടക്കാനിരിക്കെയാണ് കോണ്‍ഗ്രസ് നേതാക്കൾ ബിജെപിയിലെത്തിയത്.
പൗരത്വ ഭേദഗതി നിയമത്തെയും ദേശീയ പൗരത്വ രജിസ്റ്ററിനെയും എതിർക്കുന്ന കോണ്‍ഗ്രസ് നിലപാട് തെറ്റാണെന്ന് അമോങ്കർ വ്യക്തമാക്കി. കോണ്‍ഗ്രസ് ജനങ്ങളെ, പ്രത്യേകിച്ച് ന്യൂനപക്ഷങ്ങളെ തെറ്റിദ്ധരിപ്പിക്കുകയാണെന്നും അമോങ്കർ പറഞ്ഞു.
