ദൂരദർശനിലെ നൊസ്റ്റാൾജിയ ഗാനങ്ങൾ ഒരിക്കൽ കൂടി കേൾക്കൂ…

ഉപഗ്രഹ ചാനലുകളുടെയും സോഷ്യൽ മീഡിയയുടെയും കുത്തൊഴുക്കിന് മുൻപ് ഓരോ വീട്ടിലെയും സ്വീകരണ മുറിയെ ദൂരദർശന്റെ ഭൂതല സംപ്രേഷണം ഉത്സവമാക്കിയ ഒരു ഭൂതകാലം നമുക്കുണ്ട്.ശനിയാഴ്ചകളിലെ മലയാള സിനിമയും വ്യാഴാഴ്ചകളിലെ ചിത്രഗീതവും തിങ്കളാഴ്ചകളിലെ തപ്പും തുടിയുമൊക്കെ കാഴ്ചവസന്തമൊരുക്കിയ ഒരു കാലം .

വെറും രണ്ടര മണിക്കൂർ നേരം നീണ്ടു നിൽക്കുന്ന അന്നത്തെ മലയാളം സംപ്രേഷണത്തിൽ മറ്റുപരിപാടികൾക്കു പുറമെ ഏറെ പ്രിയങ്കരമായിരുന്നു ഇടവേളകളിൽ ഫില്ലറുകൾ ആയി ഉപയോഗിച്ചിരുന്ന ചില ലളിത ഗാനങ്ങൾ .ഒരു പക്ഷെ മൂന്നു പതിറ്റാണ്ടു മുൻപുള്ള ടിവി ആസ്വാദകരുടെ മനസ്സിൽ ഇപ്പോഴും ഉണ്ടാകും ആ നിത്യസുന്ദരഗാനങ്ങൾ .അവയിൽ ചിലതു ഇതാ ….

1 .ഒന്നിനി ശ്രുതി താഴ്ത്തി ….

മലയാള ചലച്ചിത്ര ഗാനങ്ങൾക്ക് അമരത്വം നൽകിയ ഓ എൻ വി -ദേവരാജൻ കൂട്ടുകെട്ടാണ് ഈ ഗാനത്തിന്റെ ശിൽപ്പികൾ .ഒരു ഓണക്കാലത്ത്‌ ദൂരദർശൻ ഒരുക്കിയ ഗാനോപഹാരത്തിനു വേണ്ടി ഒരുക്കിയ ഈ ഗാനം ആലപിച്ചിരിക്കുന്നത് മലയാളത്തിന്റെ ഭാവഗായകൻ പി ജയചന്ദ്രനാണ് ..

2 .കർണ്ണികാര തീരങ്ങൾ …..

ദൂരദർശന്റെ ലളിതഗാനശേഖരത്തിലെ മറ്റൊരു സുപ്രസിദ്ധഗാനം .ഗിരീഷ് പുത്തഞ്ചേരിയുടെ കാവ്യപദങ്ങൾക്കു മലയാണ്മയുടെ സംഗീതമൊരുക്കിയത് എം ജയചന്ദ്രനാണ് .ജി വേണുഗോപാൽ എന്ന മലയാളിയുടെ പ്രിയപ്പെട്ട ഗായകൻ അനശ്വരമാക്കിയ ഈ ഗാനം ഇന്നും ഓരോ മലയാളിമനസ്സിലെയും വേണുനാദമാണ് ….

3 .പൂത്തിരുവാതിര തിങ്കൾ ….

ഈ ഗാനം പലർക്കും പഴയകാലത്തെ ഒരു ഓർമ്മപെടുത്തലാണ്. ഒരിക്കലും തിരിച്ചു കിട്ടാത്ത ആ നല്ല നാളുകൾ … ഈ ജന്മം ഇനി അതെല്ലാം അന്യമാണെന്നു ഓർക്കുമ്പോൾ നെഞ്ച് പൊടിയുന്ന വേദന.കെ എസ ചിത്രയുടെ മനോഹരമായ ആലാപനത്തിലൂടെ ഒരു നൊമ്പരമായി നിറയുന്നു ഈ ഗാനം

4 .സ്‌മൃതിതൻ ചിറകിലേറി ….

എം ജയചന്ദ്രൻ എന്ന സംഗീതസംവിധായകനെ സംഗീതരംഗത്തു അടയാളപ്പെടുത്തിയത് ഈ ഗാനത്തിലൂടെയാണ് .പി ജയചന്ദ്രന്റെ ഭാവാത്മകമായ ആലാപനം സ്മൃതിയുടെ ചിറകിലേറ്റി നമ്മുടെ ബാല്യകാലത്തേക്കു കൂട്ടികൊണ്ടു പോകുന്നു ….ആരായാലും കുളവും കല്പടവുമൊക്കെ ഗൃഹാതുര സ്മൃതികളായി ഉള്ളിൽ നിറയുന്നു ….

5 .പകൽവാഴുംആദിത്യൻ …

ഗിരീഷ് പുത്തഞ്ചേരി -എം ജയചന്ദ്രൻ ടീം ഒരുക്കിയ മറ്റൊരു മനോഹര ഗാനം .യുവഗായകൻ ബിജു നാരായണനും ചിത്രയും ചേർന്നാലപിച്ച ഈ പാട്ടിനു ഇന്നും പുതുമ നശിച്ചിട്ടില്ല …

6 .പുഷ്പസുരഭില ശ്രവണത്തിൽ …

മാധുര്യമൂറുന്ന ഗാനങ്ങൾ മലയാളികൾക്ക് സമ്മാനിച്ച ഗായികയാണ് മാധുരി .മാധുരിയുടെ കിളികൊഞ്ചല് ശബ്ദത്തിൽ നിറഞ്ഞ ഒരു ഓണക്കാല ഗാനം .പി ഭാസ്കരൻ -ദേവരാജൻ കൂട്ടുകെട്ട് അണിയിച്ചൊരുക്കിയതാണ് ഈ എവർഗ്രീൻ ഹിറ്റ് .

7 .മുത്താരം പാടത്തെ …

സംഗീതസംവിധായകനായ മോഹൻസിത്താര പാടി അഭിനയിച്ച ഈ ഗാനം ദൂരദർശനിൽ വന്നത് ഒരു ഓണകാലത്തായിരുന്നു .പക്ഷെ പ്രേക്ഷകരുടെ നിരന്തരമായ അഭ്യർത്ഥന മാനിച്ചു ഈ ഗാനം പുനഃ സംപ്രേഷണം ചെയ്യാൻ പലതവണ ദൂരദർശൻ നിർബന്ധിതമായി ..

8 .വലം പിരി ചുരുൾ മുടി …

ഒരുപക്ഷെ പരിപാടികളുടെ ഇടവേളകളിൽ ഏറ്റവും തവണ സംപ്രേഷണം ചെയ്ത ഒരു ലളിത ഗാനമാണിത് .ഗിരീഷ് പുത്തഞ്ചേരിയുടെ വിയോഗം ഒരു തീരാനഷ്ട്മാണ് എന്ന് നമ്മളെ തോന്നിപ്പിക്കുന്ന ഒരു ഗാനം എം ജയചന്ദ്രന്റെ സംഗീതവും വേണുഗോപാലിന്റെ ആലാപനാവശ്യതയും കൂടിയാകുമ്പോൾ ഈ ഗാനത്തിന് സൗന്ദര്യമേറുകയാണ് ….

9 .നീലകായലിൽ ഓളപ്പാത്തിയിൽ …

പി ജയചന്ദ്രനും മധുരിയും ചേർന്ന് അനശ്വരമാക്കിയ മറ്റൊരു ദൂരദർശൻ ഹിറ്റ് .പി ഭാസ്കരനും ദേവരാജൻ മാസ്റ്ററും ചേർന്നൊരുക്കിയ ഈ ഗാനം സിനിമാഗാനമാണെന്ന് തെറ്റിദ്ധരിച്ചവരും ഉണ്ട് .

10 .പൂക്കച്ച മഞ്ഞ കച്ച …

1992 ലെ ഓണക്കാലത്തു ഓണ പാട്ടുമായി ദൂരദർശനിൽ എത്തിയത് സാക്ഷാൽ നമ്മുടെ ലാലേട്ടൻ തന്നെയായിരുന്നു .ബിച്ചു തിരുമലയും ബേർണി ഇഗ്നേഷ്യസും ചേർന്നൊരുക്കിയ ആ ഗാനം ഇന്നും ഓരോ മലയാളിയുടെ ഉള്ളിൽ ത്തി കളിക്കുന്നുണ്ടാവും ….