പ്രതിഭാശലഭങ്ങൾ അരങ്ങുവാഴുന്ന സർഗ്ഗവസന്തത്തിലേക്ക് മിഴിതുറന്ന് കേരളം! അറുപത്തി ഒന്നാമത് സംസ്ഥാന സ്കൂൾ കലോത്സവത്തിന് തിരിതെളിഞ്ഞു; മഹാമാരി അരങ്ങൊഴിയുമ്പോൾ കേരളത്തിന് മേളക്കൊഴുപ്പായി ഇനി അഞ്ചു ദിനരാത്രങ്ങൾ

കോഴിക്കോട്: 61മത് സംസ്ഥാന സ്കൂൾ കലോത്സവം കോഴിക്കോട്ട് ആരംഭിച്ചു. രാവിലെ 10 മണിക്ക് മുഖ്യമന്ത്രി പിണറായി വിജയൻ അതിരാണിപ്പാടം എന്ന് പേരിട്ട മുഖ്യ വേദിയിൽ കലോത്സവ ദീപം തെളിയിച്ച് കലാമേള ഉദ്ഘാടനം ചെയ്തു. മാറുന്ന കാലത്തേക്ക് പിടിച്ച കണ്ണാടിയാവുകയാണ് കലോൽസവമെന്നും സാമൂഹ്യ വിമർശനത്തിന്‍റേയും നവീകരണത്തിന്‍റേയും ചാലു കീറാനായി വിദ്യാർഥികൾ കലാരൂപങ്ങളെ മാറ്റുന്ന സാംസ്കാരിക ഉൽസവമാണെന്നും അദ്ദേഹം വ്യക്തമാക്കി .വിജയിക്കലല്ല പങ്കെടുക്കുന്നതിലാണ് കാര്യമെന്നും അദ്ദേഹം പറഞ്ഞു.

അനാവശ്യ മൽസര പ്രവണത രക്ഷിതാക്കൾ കാണിക്കരുതെന്നും എല്ലാ കുട്ടികളുടെയും വിജയത്തിൽ സന്തോഷിക്കാൻ കഴിയണമെന്നും അദ്ദേഹം പറഞ്ഞു. അന്യം നിന്നു പോകുന്ന കലാരൂപങ്ങളെ കലോൽസവങ്ങളിലൂടെവീണ്ടെടുക്കാൻ സഹായിക്കുന്നു. കോവിഡ് മുൻകരുതലുകൾ എടുക്കണമെന്നും .അതിവ ജാഗ്രത വേണമെന്നും അദ്ദേഹം പറഞ്ഞു

കോവിഡ് പ്രതിസന്ധിയെ തുടർന്ന് രണ്ടുവർഷത്തെ ഇടവേളയ്ക്കു ശേഷമാണ് സ്കൂൾ കലാമേള വീണ്ടും നടക്കുന്നത്. അഞ്ച് ദിവസം കൊണ്ട് 24 വേദികളിലായി 239 ഇനങ്ങളിലാണ് പ്രതിഭകൾ അരങ്ങിലിറങ്ങുക.
അതിനോടൊപ്പം ഗോത്രകലകളെ കലോൽസവത്തിൽ ഉൾപ്പെടുത്തുന്ന കാര്യം പരിഗണനയിലുണ്ടെന്ന് വിദ്യാഭ്യാസമന്ത്രി വി ശിവന്‍കുട്ടി പറഞ്ഞു.