108 ആംബുലന്‍സുകളില്‍ ആന്റിവെനം ലഭ്യമെന്ന പ്രചാരണം വ്യാജം. കര്‍ശന നടപടിയെന്ന് അധികൃതര്‍

തിരുവനന്തപുരം : പാമ്പുകടിയേറ്റാല്‍ നല്‍കുന്ന ആന്റിവെനം 108 ആംബുലന്‍സുകളിലും ലഭ്യമാണെന്ന രീതിയില്‍ സാമൂഹ്യമാധ്യമങ്ങളില്‍ പ്രചരിക്കുന്ന സന്ദേശങ്ങള്‍ വ്യാജമാണെന്ന് അധികൃതര്‍ വ്യക്തമാക്കി. ഇത്തരം സന്ദേശങ്ങള്‍ പ്രചരിപ്പിക്കുന്നവര്‍ക്കെതിരെ കര്‍ശന നിയമനടപടി സ്വീകരിക്കുമെന്ന് 108 ആംബുലന്‍സ് കേരളം അറിയിച്ചു.

കഴിഞ്ഞ കുറച്ചു ദിവസങ്ങളായി വാട്‌സാപ്പ് ഉള്‍പ്പെടെയുള്ള സാമൂഹ്യമാധ്യമങ്ങളില്‍ വ്യാപകമായ സന്ദേശം പ്രചരിക്കുന്നുണ്ട്. ‘പാമ്പുകടിയേറ്റാല്‍ ഉടന്‍ 108-ലേക്ക് വിളിച്ചാല്‍ ആംബുലന്‍സ് രോഗിയുടെ അരികിലെത്തി ആവശ്യമായ ഇഞ്ചക്ഷനും പ്രാഥമിക ചികിത്സയും നല്‍കും’ എന്ന തരത്തിലുള്ള സന്ദേശമാണ് ജനങ്ങളില്‍ ആശയക്കുഴപ്പം സൃഷ്ടിക്കുന്നത്. വ്യാജ പ്രചാരണം ശ്രദ്ധയില്‍പ്പെട്ടതിനെ തുടര്‍ന്ന് സംസ്ഥാന പോലീസ് മേധാവിക്ക് ഔദ്യോഗികമായി പരാതി നല്‍കിയിട്ടുണ്ട്.

108 ആംബുലന്‍സുകളില്‍ നിലവില്‍ ആന്റിവെനം ലഭ്യമല്ല. പാമ്പുകടിയേറ്റ രോഗിക്ക് ആവശ്യമായ പ്രഥമശുശ്രൂഷ നല്‍കി, എത്രയും പെട്ടെന്ന് ആന്റിവെനം ലഭ്യമായ ആശുപത്രിയില്‍ എത്തിക്കുകയാണ് 108 ആംബുലന്‍സ് ജീവനക്കാര്‍ ചെയ്യുന്നത്. പാമ്പുകടിയേറ്റാല്‍ അടിയന്തര സഹായത്തിനായി എപ്പോഴും 108 എന്ന നമ്പറിലേക്ക് വിളിക്കാം. എന്നാല്‍, ആംബുലന്‍സില്‍ ആന്റിവെനം ലഭ്യമാണെന്ന് തെറ്റിദ്ധരിച്ച് വിലപ്പെട്ട സമയം പാഴാക്കരുതെന്ന് അധികൃതര്‍ മുന്നറിയിപ്പ് നല്‍കുന്നു.