73-ാം റിപ്പബ്ലിക് നിറവിൽ ഭാരതം; ഇന്ത്യൻ ജനാധിപത്യം ലോകത്തിന് തന്നെ മാതൃകയെന്ന് രാഷ്‌ട്രപതി; റിപ്പബ്ലിക്ക് പരേഡിന്റെ തത്സമയക്കാഴ്ച രാവിലെ 9 മണി മുതൽ തത്വമയി നെറ്റ് വർക്കിൽ കാണാം

ദില്ലി: എഴുപത്തിമൂന്നാം റിപ്പബ്ലിക്ക് ദിന (Republic Day In India) നിറവിൽ രാജ്യം. ഒരു മഹാമാരിയുമായി പോരാടിക്കൊണ്ടിരിക്കുന്ന സമയത്ത് കനത്ത നിയന്ത്രണങ്ങളോടെയാണ് രാജ്യം ഇന്ന് റിപ്പബ്ലിക്ക് ദിനം ആഘോഷിക്കുന്നത്. അതുകൊണ്ടു തന്നെ പരേഡ് സഞ്ചരിക്കുന്ന ദൂരം മൂന്ന് കിലോമീറ്ററായി ചുരുക്കി. 8.2 കിലോമീറ്ററായിരുന്നു മുൻപ് സഞ്ചരിച്ചിരുന്ന ദൂരം. വിജയ്ചൗക്കിൽ നിന്ന് തുടങ്ങുന്ന പരേഡ് ഇന്ത്യ ഗേറ്റിനടുത്തുള്ള നാഷണൽ സ്റ്റേഡിയത്തിൽ അവസാനിപ്പിക്കും. ഇത്തവണ വിശിഷ്ടാതിഥിയില്ല. ദില്ലി പോലീസ് കമ്മീഷണർ രാകേഷ് അസ്താനയുടെ നേതൃത്വത്തിൽ 27,000 പോലീസുകാരെ സുരക്ഷയ്‌ക്കായി നിയോഗിച്ചിട്ടുണ്ട്. അതേസമയം, പരേഡിൽ പങ്കെടുക്കുന്ന ടീമുകളിലെ അംഗങ്ങളുടെ എണ്ണവും കുറച്ചിട്ടുണ്ട്. അതേസമയം റിപ്പബ്ലിക്ക് പരേഡിന്റെ തത്സമയക്കാഴ്ച രാവിലെ 9 മണി മുതൽ തത്വമയി നെറ്റ് വർക്കിൽ കാണാം

രാഷ്ട്രപതിയുൾപ്പെടെയുള്ള നേതാക്കൾ റിപ്പബ്ലിക്ക് ദിനാശംസകൾ നേർന്ന് എത്തിയിട്ടുണ്ട്. രാജ്യത്തിന് അകത്തും പുറത്തുമുള്ള എല്ലാ ഇന്ത്യക്കാർക്കും റിപ്പബ്ലിക് ദിനാശംസകൾ നേരുന്നുവെന്ന് രാഷ്‌ട്രപതി പറഞ്ഞു. പോയ വർഷം ഒരുപാട് പാഠങ്ങൾ പഠിക്കാനായി. ജനങ്ങളെ ഒരുചരടിൽ കോർക്കുന്ന ഭാരതീയരുടെ പ്രതിഫലനമാണ് റിപ്പബ്ലിക് ദിനം. നമ്മുടെ ജനാധിപത്യത്തിന്റെ നാനാത്വവും ഊർജ്ജവും ലോകം മുഴുവൻ അഭിനന്ദിക്കുന്നതാണ്. ഈ അവസരത്തിൽ സ്വാതന്ത്ര്യ സമര സേനാനികളെ ഓർക്കാമെന്നും രാഷ്‌ട്രപതി പറഞ്ഞു.

‘റെസ് പബ്ലിക്ക’ എന്ന ലാറ്റിൻ പദത്തിൽ നിന്നാണ് റിപ്പബ്ലിക്ക് എന്ന വാക്കുണ്ടായത്. ‘ജനക്ഷേമരാഷ്‌ട്രം’ എന്നാണ് റിപ്പബ്ലിക്ക് എന്ന വാക്കിന്റെ അർത്ഥം.പ്രത്യേക ഭരണഘടനയ്‌ക്ക് കീഴിൽ രാജ്യത്തെ ഭരണം നിർവ്വഹിക്കുന്നതിനുള്ള രാഷ്‌ട്രത്തലവനെ ജനങ്ങൾ തെരഞ്ഞെടുക്കുന്ന സമ്പ്രദായം നിലനിൽക്കുന്ന രാഷ്‌ട്രങ്ങളെയാണ് ‘റിപ്പബ്ലിക്ക്’ എന്ന് വിളിക്കുന്നത്.1950 ജനുവരി 26നാണ് ഇന്ത്യയുടെ ഭരണഘടന പ്രാബല്യത്തിൽ വരുന്നത്. ധാരാളം നാൾവഴികൾ പിന്നിട്ട ഇന്ത്യയുടെ സ്വന്തം ഭരണഘടന, നിയമപരമായി പ്രാബല്യത്തിൽ വന്ന ദിവസമാണ് റിപ്പബ്ലിക് ദിനമായി ആഘോഷിക്കുന്നത്. 1949 നവംബർ 26 നാണ് ഇന്ത്യൻ ഭരണഘടന ആദ്യമായി അംഗീകരിക്കപ്പടുന്നത്. അതിനാൽ നവംബർ 26 ഭരണഘടനാ ദിനമായി ആചരിക്കുന്നു.