കൊച്ചി: പുരാവസ്തു തട്ടിപ്പ് കേസിൽ അറസ്റ്റിലായി പോലീസ് കസ്റ്റഡിയിൽ കഴിയുന്ന മോൻസൺ മാവുങ്കലിന്റെ കസ്റ്റഡി കാലാവധി നീട്ടി. മോൻസനെ മൂന്ന് ദിവസത്തേക്ക് കൂടി കസ്റ്റഡിയിൽ വിട്ടിരിക്കുകയാണ്. ഒക്ടോബർ രണ്ട് വരെയാണ് കസ്റ്റഡി നീട്ടിയത്. എറണാകുളം എസിജെഎം കോടതിയുടേതാണ് ഉത്തരവ്.
അതേസമയം ആകെയുള്ളത് ഒരു ബാങ്ക് അക്കൗണ്ട് മാത്രമാണെന്നും അതില് വെറും 176 രൂപ മാത്രമേ ഉള്ളുവെന്നും മകളുടെ കല്യാണത്തിന് സുഹൃത്തായ ജോര്ജില് നിന്ന് കടം വാങ്ങിയെന്നും കൂടെയുള്ളവര്ക്ക് ആറ് മാസമായി ശമ്പളം പോലും നല്കിയിട്ടില്ലെന്നും മോന്സണ് മാവുങ്കല് ക്രൈം ബ്രാഞ്ചിന് മൊഴി നല്കിയിരിക്കുകയാണ്.
എന്നാൽ ആളുകളെ പറ്റിച്ച് കോടികൾ സമ്പാദിച്ച മോന്സണിന്റെ ബാങ്ക് അക്കൗണ്ട് വിവരങ്ങള് കണ്ട് ഞെട്ടിയിരിക്കയാണ് ക്രൈം ബ്രാഞ്ച് ഉദ്യോഗസ്ഥര്. തട്ടിപ്പ് നടത്തിയുണ്ടാക്കിയ പണമെല്ലാം ആര്ഭാട ജീവിതത്തിനാണ് ഇയാള് ഉപയോഗിച്ചിരുന്നത്.
മാത്രമല്ല അറസ്റ്റ് ചെയ്യപ്പെടുന്നതിന് മുന്പുള്ള സമയത്ത് കാര്യമായ ഇടപാടുകള് ഒന്നും നടക്കാത്തതിനാല് ഇയാള് സാമ്പത്തിക പ്രതിസന്ധിയിലായി എന്നാണ് ലഭിക്കുന്ന വിവരം.
