കൊച്ചി :വിഷപ്പുകയിൽ മുങ്ങി കൊച്ചി നഗരം.നിരവധിപേർ ആശുപത്രിയിൽ കഴിയുകയാണ്.നഗരത്തിലാകെ പുകയും പ്ലാസ്റ്റിക് കത്തുന്നതിന്റെ മണവും വമിക്കുകയാണ്. കലൂര്‍, പാലാരിവട്ടം, ഇടപ്പള്ളി, കാക്കനാട്, വൈറ്റില മേഖലകളില്‍ കനത്ത പുകയാണ് ഇപ്പോള്‍ അനുഭവപ്പെടുന്നത്.
എന്നാൽ തീ വീണ്ടും ആളിപടരുകയാണ്. ഇതുവരെയും അണയ്ക്കാൻ കഴിഞ്ഞിട്ടില്ല.തീ അണയ്ക്കുന്നതിനനുസരിച്ച് പുക ഉയരുന്ന സ്ഥിതിയാണ് നിലവില്‍. കാറ്റിനൊപ്പമെത്തുന്ന ഈ പുക നഗരത്തിലെ വിവിധ ഭാഗങ്ങളില്‍ വ്യാപിച്ചുകഴിഞ്ഞു. കലൂര്‍ സ്റ്റേഡിയം, ഇരുമ്പനം, ചിറ്റേത്തുകര, പാലാരിവട്ടം, തൃപ്പൂണിത്തുറ തുടങ്ങിയ മേഖലകളിലെല്ലാം ശക്തമായ പുകയാണ് പടരുന്നത്.
ജനവാസമേഖലകളിലെ പുക വലിയ പ്രശ്‌നമാണ് സൃഷ്ടിക്കുന്നത്. ബ്രഹ്‌മപുരം പ്ലാന്റിനടുത്തുള്ള വീടുകളിലെ മിക്ക ആളുകളും നിലവില്‍ പ്രദേശത്ത് നിന്ന് മാറിത്താമസിക്കുകയാണ്.പല വിധ ആരോഗ്യപ്രശ്നങ്ങളിൽ ബുദ്ധിമുട്ടുന്നവർ ശ്രദ്ധയോടെ കൈകാര്യം ചെയ്യേണ്ട അവസ്ഥയാണെന്ന് ആരോഗ്യ വിദഗ്ധർ അറിയിച്ചു. മുതിർന്നവരും,കുട്ടികളും ശ്വസന സംബന്ധമായ പ്രശ്നങ്ങളുള്ളവരും അതീവ കരുതലെടുക്കണമെന്ന് ആരോഗ്യവിദഗ്ധർ മുന്നറിയിപ്പ് നൽകി. മാസ്ക് ധരിച്ച് മാത്രം പുറത്തിറങ്ങേണ്ട അന്തരീക്ഷ അവസ്ഥയാണ് കൊച്ചി നഗരത്തിൽ പകൽ സമയങ്ങളിലും പ്രതീക്ഷിക്കേണ്ടത്.
