തൃശൂര്: കൈക്കൂലി വാങ്ങുന്നതിനിടെ വിജിലന്സ് പിടിയിലായ തൃശൂര് മെഡിക്കല് കോളജിലെ ഡോക്ടര് ഷെറി ഐസക്കിനെ ആരോഗ്യവകുപ്പ് സസ്പെന്ഡ് ചെയ്തു. ഇയാളുടെ സ്വത്ത് വകകളിൽ ഇഡി അന്വേഷണം നടത്തുമെന്നാണ് വിവരം. ഷെറിയുടെ വീട്ടില് നടത്തിയ പരിശോധനയില് 15 ലക്ഷം രൂപ പിടിച്ചെടുത്തിരുന്നു. ഇഡിക്ക് പുറമേ വിജിലന്സ് സ്പെഷ്യല് സെല്ലും ഷെറി ഐസക്കിന്റെ സ്വത്തുക്കളിന്മേല് അന്വേഷണം നടത്തുമെന്നാണ് റിപ്പോര്ട്ട്.
അതിനിടെ, ഷെറി ഐസക് ചികിത്സ നല്കിയിരുന്നത് പണം നല്കുന്നവര്ക്ക് മാത്രമാണെന്ന് വിജിലന്സ് കണ്ടെത്തി. ഓട്ടുപാറയിലെ ക്ലിനിക്കിന് സമീപത്തെ മെഡിക്കല് ഷോപ്പ് വഴിയാണ് കൈക്കൂലിത്തുക ഉറപ്പിച്ചിരുന്നത്. ക്ലിനിക്കില് ഡോക്ടറെ കാണാനുള്ള ബുക്കിങ്ങും മെഡിക്കല് ഷോപ്പ് വഴിയായിരുന്നു. ഡോക്ടറുടെ ഫീസും ശസ്ത്രക്രിയയ്ക്ക് നല്കേണ്ട തുകയും മെഡിക്കല്ഷോപ്പ് ആണ് രോഗികളെ അറിയിച്ചിരുന്നതെന്നും വിജിലന്സ് പറയുന്നു.
