തിരുവനന്തപുരം: അതിർത്തിയിലെ ചെെനയുടെ സൈനിക നീക്കങ്ങളും പാകിസ്ഥാന്റെ നുഴഞ്ഞുകയറ്റവും കടലിലെ സുരക്ഷാ ഭീഷണിയും നേരിടുക എന്ന ലക്ഷ്യത്തോടെ ബഹിരാകാശത്തു നിന്ന് കരയിലും കടലിലും ഭാരതത്തിന്റെ അതിർത്തികൾ നിരീക്ഷിച്ച് വിവരങ്ങൾ തത്സമയം സൈന്യത്തിന് കൈമാറാൻ 50 ഉപഗ്രഹങ്ങളുടെ ഇന്റലിജൻസ് ശൃംഖല സ്ഥാപിക്കും. വരുന്ന അഞ്ചുവർഷത്തിനുള്ളിൽ ശൃംഖലയിലെ ഉപഗ്രഹങ്ങളെല്ലാം വിക്ഷേപിക്കും. 29,147കോടി രൂപയാണ് പദ്ധതിയുടെ ചെലവായി കണക്കാക്കുന്നത്. ഭൂമിയിൽ നിന്ന് 36,000കിലോമീറ്റർ അകലെയുള്ള ജിയോസ്റ്റേഷനറി ഇക്വറ്റോറിയൽ ഓർബിറ്റ് മുതൽ 400 കിലോമീറ്റർ അകലെയുള്ള ലിയോ ലോവർ എർത്ത് ഓർബിറ്റ് വരെയാകും ഉപഗ്രങ്ങൾ വിന്യസിക്കുക.
നിലവിൽ രാജ്യത്തിന്റെ 54 ഉപഗ്രഹങ്ങളിൽ 17 എണ്ണം സൈനിക ആവശ്യത്തിനുള്ളതാണ്. ഈ ഉപഗ്രഹങ്ങൾ ചിത്രങ്ങളും മറ്റ് വിവരങ്ങളും ഭൂമിയിലെ കേന്ദ്രത്തിലേക്ക് അയയ്‌ക്കുകയും അവിടെ വിശകലനം ചെയ്‌ത് ആവശ്യമുള്ളത് സേനയ്ക്ക് നൽകുകയുമാണ് രീതി. പുതിയ സംവിധാനം പ്രാവർത്തികമാകുന്നതോടെ നിലവിലുള്ളതിന്റെ പത്ത് മടങ്ങ് ശേഷിയിലാകും ഈ പ്രവൃത്തി നടക്കുക.
36,000 കിലോമീറ്റർ അകലെയുള്ള ഭ്രമണപദത്തിലുള്ള ഉപഗ്രഹത്തിന് ദൃശ്യപരിധി കൂടുതലായിരിക്കും. കാശ്‌മീരിലെയും മറ്റും അതിർത്തികളിലെ നീക്കങ്ങൾ ആദ്യം കാണുക ഈ ഉപഗ്രഹമാവും. അത് ഭൂമിയോട് അടുത്തുള്ള ഉപഗ്രഹങ്ങൾക്ക് കൈമാറും. തുടർന്ന് ഇവ അവ കൂടുതൽ വ്യക്തമായ വിവരങ്ങൾ ശേഖരിച്ച് സ്വയം അപഗ്രഥിച്ച് ഭൂമിയിലെ സൈനിക കേന്ദ്രത്തിന് കൈമാറും. സൈനിക കേന്ദ്രങ്ങളുടെ വാർത്താവിനിമയ ഏകോപനവും ഉപഗ്രഹങ്ങൾ തന്നെ നിർവ്വഹിക്കും.
രഹസ്യാന്വേഷണം, ചാരനിരീക്ഷണം, ശത്രുക്കൾക്ക് ചോർത്താനാവാത്ത വാർത്താവിനിമയം, അതിർത്തികളിലെ സൈനിക വിന്യാസവും നിർമ്മാണങ്ങളും കടലിലെ നീക്കങ്ങളും നിരീക്ഷിക്കൽ, വിവരങ്ങൾ കൈമാറൽ, സൈനിക ഏകോപനം. മുതലായവയാണ് പുതിയ ഉപഗ്രഹ ശൃംഖലയിലൂടെ ലക്ഷ്യമിടുന്നത്.
